കല്പറ്റന്മ : കുറുക്കന്മൂലയില് 20 ദിവസത്തോളമായി നാടിനെ ഭീതിയിലാഴ്ത്തിയ കടുവയെ കണ്ടെത്തിയെന്ന് വനംവകുപ്പ്. കടുവ നിരീക്ഷണ വലയത്തില് ഉണ്ടെന്നും ഉടന് മയക്കുവെടി വെച്ച് പിടികൂടാന് കഴിയുമെന്നാണ് പ്രതീക്ഷയെന്നും വനംവകുപ്പ് ഉദ്യോഗസ്ഥര് വ്യക്തമാക്കി. ഇരുപതോളം വളര്ത്തു മൃഗങ്ങളെയാണ് കടുവ ഇതുവരെ കൊന്നത്. കഴുത്തില് ആഴത്തില് മുറിവേറ്റ നിലയിലാണ് കടുവ. മുയലിനെയും പന്നിയെയും കുടുക്കാന് മനുഷ്യര് ഒരുക്കിയ കുടുക്കില് പെട്ടാണ് മുറുവേറ്റതെന്നാണ് സൂചന.
മുറിവുകളുള്ള കടുവ കാട്ടില് ഇര തേടാന് കഴിയാതെ ജനവാസ മേഖലയില് തമ്പടിച്ചതായാണ് നിഗമനം. കുറുക്കന്മൂലയില് സംഘര്ഷത്തിനിടെ കത്തിയൂരിയ വനപാലകനെതിരെ കേസെടുത്തു. കടുവ ട്രാക്കിങ്ങ് ടീമിലെ ഹുസൈന് കല്പ്പൂരിനെതിരെ നാട്ടുകാരെ തടഞ്ഞുവച്ച് മര്ദിച്ചെന്ന പരാതിയിലാണ് മാനന്തവാടി പൊലീസ് കേസെടുത്തത്. വനംവകുപ്പിന്റെ പരാതിയില് നേരത്തേ നഗരസഭ കൗണ്സിലര് വിപിന് വേണുഗോപാലനെതിരെ പോലീസ് കേസെടുത്തിരുന്നു.
