കണ്ണൂര് : കുറുവാസംഘത്തിലെ പിടികിട്ടാപ്പുള്ളിയെ കണ്ണൂര് ജില്ലയിലെ ഒളിസങ്കേതത്തില് നിന്ന് പോലീസ് അറസ്റ്റ് ചെയ്തു. നിരവധി കവര്ച്ചാകേസുകളില് പ്രതിയും പത്തു വര്ഷം മുമ്പ് പിടികിട്ടാപ്പുള്ളിയായി പ്രഖ്യാപിക്കുകയും ചെയ്ത കോഴിക്കോട് വളയം കല്ലാച്ചി ലക്ഷം വീട് കോളനിയിലെ രാജനെയാണ് മലപ്പുറം ജില്ലാ ക്രൈം സ്ക്വാഡ് പയ്യന്നൂരിനടുത്ത മാത്തിലിലെ ചൂരലില് നിന്ന് അറസ്റ്റ് ചെയ്തത്.
പോലീസിന്റെ കണ്ണു വെട്ടിച്ച് പെരിങ്ങോം പോലീസ് സ്റ്റേഷന് പരിധിയിലെ ചൂരലിലെ ഒളിസങ്കേതത്തില് കഴിയുകയായിരുന്നു ഇയാള്. അന്വേഷണസംഘത്തിന് ലഭിച്ച രഹസ്യവിവരത്തെ തുടര്ന്നാണ് ഇയാളെ പിടികൂടാനായത്. മഞ്ചേരി, നിലമ്പൂര്, പെരിന്തല്മണ്ണ എന്നീ പോലീസ് സ്റ്റേഷനുകളില് രജിസ്റ്റര് ചെയ്ത 11 കേസുകളിലാണ് കോടതി ഇയാളെ പിടികിട്ടാപ്പുള്ളിയായി പ്രഖ്യാപിച്ചത്. നേരത്തെ പാലക്കാട് ആലത്തൂരില്നിന്ന് കുറുവാ സംഘത്തിലുള്പ്പെട്ട നിരവധി മോഷണക്കേസുകളില് പ്രതികളായ മൂന്നുപേരെ പോലീസ് പിടികൂടിയിരുന്നു.
തമിഴ്നാട് ശിവഗംഗ സ്വദേശി മാരിമുത്തു, മധുര സ്വദേശിയും കോഴിക്കോട് താമസക്കാരനുമായ തങ്കപ്പാണ്ടി, തഞ്ചാവൂര് സ്വദേശി ശെല്വി പാണ്ഡ്യന് എന്നിവരായിരുന്നു നേരത്തെ അറസ്റ്റിലായത്. ഈ മോഷണസംഘത്തിലെ കണ്ണിയാണ് പിടിയിലായ രാജന്. പകല് സമയത്ത് ആക്രി സാധനങ്ങള് ശേഖരിക്കാനെത്തുന്നവരെ പോലെ നടിച്ച് മോഷണം നടത്താനുള്ള വീടുകളുടെ വിവരങ്ങള് കൃത്യമായി മനസിലാക്കിയാണ് ഇവര് മോഷണം ആസൂത്രണം ചെയ്യുന്നത്.
മാരകായുധങ്ങളുമായി എത്തുന്ന കുറുവാസംഘം വാതില് തകര്ത്തും വീട്ടിലുള്ളവരെ ആക്രമിച്ചാണ് കവര്ച്ച നടത്താറ്. വീടിന്റെ പുറത്തുള്ള പൈപ്പുകള് തുറന്നിടുകയും വീട്ടുകാര് പൈപ്പ് പൂട്ടാനായി പുറത്തിറങ്ങുന്പോള് ആക്രമിച്ച് മോഷണം നടത്തുന്നതും ചെറിയ കുട്ടികളുടെ ശബ്ദമുണ്ടാക്കിയശേഷം വീട്ടുകാര് വാതില് തുറക്കുന്പോള് ആക്രമിച്ച് കവര്ച്ച നടത്തുന്നതും രാത്രികാലങ്ങളില് റോഡുകളില് പതിയിരുന്ന് യാത്രക്കാരെ ആക്രമിച്ച് സ്വര്ണവും പണവും കവരുന്നതും ഇവരുടെ രീതിയാണ്.
രാത്രിയില് വീടിന് പുറത്തുള്ള പൈപ്പുകള് തുറന്നിട്ട് വെള്ളമൊഴുകുന്ന ശബ്ദമോ അസ്വാഭാവികമായി എന്തെങ്കിലും ശ്രദ്ധയില്പ്പെട്ടാലോ വാതിലുകള് തുറക്കരുതെന്ന് പോലീസ് മുന്നറിയിപ്പ് നല്കുന്നു. ഇത്തരം സാഹചര്യത്തില് സമീപത്തെ വീട്ടുകാരെയും പോലീസിനെയും ഉടന് വിവരം അറിയിക്കണമെന്നും പോലീസ് അധികൃതര് അറിയിച്ചു
