കോഴിക്കോട് : കുതിരവട്ടം മാനസികാരോഗ്യ കേന്ദ്രത്തിലെ സുരക്ഷാ വീഴ്‌ചയില്‍ സൂപ്രണ്ടിനെ സസ്പെന്ഡ് ചെയ്‌ത നടപടി പിന്‍വലിക്കും. സസ്‌പെന്‍ഷന്‍ പിന്‍വലിക്കുമെന്ന് അധികൃതര്‍ ഉറപ്പ് നല്‍കിയതോടെ ഇന്ന് മുതല്‍ കോഴിക്കോട് ജില്ലയില്‍ കെജിഎംഒഎ പ്രഖ്യാപിച്ചിരുന്ന സമരം മാറ്റിവെച്ചു. സസ്‌പെന്‍ഷന്‍ പിന്‍വലിച്ചുകൊണ്ടുള്ള ഉത്തരവ് ഉടന്‍ ഇറങ്ങുമെന്ന ഉറപ്പിന്‍മേലാണ് തീരുമാനമെന്ന് കെജിഎംഒഎ വിശദീകരിച്ചു.
സൂപ്രണ്ടിനെ സസ്പെന്ഡ് ചെയ്‌ത നടപടിയില്‍ പ്രതിഷേധിച്ച്‌ ഇന്ന് മുതല്‍ കോഴിക്കോട് ജില്ലയിലെ എല്ലാ സര്‍ക്കാര്‍ ആശുപത്രികളിലും ഡോക്‌ടര്‍മാര്‍ കൂട്ട അവധി എടുക്കാനായിരുന്നു തീരുമാനം. കഴിഞ്ഞ മാസം 31ന് കുതിരവട്ടം മാനസികാരോഗ്യ കേന്ദ്രത്തില്‍ നിന്ന് രക്ഷപ്പെട്ട അന്തേവാസി വാഹനാപകടത്തില്‍ മരിച്ച സംഭവത്തിന് പിന്നാലെയാണ് സുരക്ഷാ വീഴ്‌ച ആരോപിച്ച്‌ സൂപ്രണ്ടിനെ സസ്പെന്ഡ് ചെയ്‌തത്‌.
വാഹന മോഷണക്കേസുകളില്‍ റിമാന്‍ഡ് പ്രതിയായിരുന്ന മലപ്പുറം സ്വദേശി മുഹമ്മദ് ഇര്‍ഫാനാണ് കോട്ടക്കലില്‍ വാഹനാപകടത്തില്‍ മരിച്ചത്. മാനസികാസ്വാസ്‌ഥ്യം പ്രകടിപ്പിച്ചതിനെ തുടര്‍ന്ന് കുതിരവട്ടം മാനസികാരോഗ്യ കേന്ദ്രത്തില്‍ പ്രവേശിപ്പിച്ച ഇയാള്‍ സ്‌പൂണ്‍ ഉപയോഗിച്ച്‌ കുളിമുറിയുടെ ഭിത്തി തുരന്നാണ് രാത്രി പുറത്തുകടന്നത്. തുടര്‍ന്ന് സൂപ്രണ്ടിനെ സസ്പെന്ഡ് ചെയ്‌തതോടെ സുരക്ഷാ വീഴ്‌ചയില്‍ സൂപ്രണ്ടിനെ മാത്രം ബലിയാടാക്കുന്നു എന്ന് ആരോപിച്ചാണ് കെജിഎംഒഎ സമരവുമായി മുന്നോട്ട് പോയത്.
