കുവൈത്ത് സിറ്റി : കുവൈത്തില് നിന്നും ഇന്ത്യയിലേക്കുള്ള വിമാനങ്ങള്ക്ക് കുവൈത്ത് വ്യോമയാന അധികൃതരില് നിന്നും അനുമതി ലഭിച്ചു. ഇതേ തുടര്ന്ന് നാളെ മുതല് വന്ദേഭാരത് പദ്ധതി പ്രകാരം കുവൈത്തില് നിന്നുള്ള ആദ്യ വിമാനങ്ങള് കൊച്ചിയിലേക്കും ഹൈദരാബാദിലേക്കും പുറപ്പെടും. കുവൈത്തില് നിന്നും കൊച്ചിയിലേക്ക് ഉച്ചയ്ക്ക് 1.45 പുറപ്പെടുന്ന വിമാനം രാത്രി 9.15 നു കൊച്ചിയിലെത്തും. ഹൈദരാബാദിലേക്ക് രാവിലെ 11.25 നാണു വിമാനം പുറപ്പെടുക. ഈ വിമാനം വൈകീട്ട് 6.30 നു ഹൈദരാബാദിലെത്തും.
ഹൈദരബാദിലേക്ക് ഇന്ന് പുറപ്പെടേണ്ടിയിരുന്ന ആദ്യവിമാനം കുവൈത്ത് വ്യോമയാന അധികൃതരില് നിന്നും അനുമതി ലഭിക്കാത്തതിനെ തുടര്ന്ന് റദ്ദ് ചെയ്തിരുന്നു. ഈ വിമാനമാണ് നാളെ പുറപ്പെടുക. ഇതിനു പുറമെ കൊച്ചിയിലേക്ക് നാളത്തേക്ക് ക്രമീകരിച്ചിരിച്ചിരുന്ന വിമാനവും നേരത്തെ നിശ്ചയിച്ചത് പോലെ സര്വീസ് നടത്തും. കുവൈത്തില് നിന്നും ഇന്ത്യക്കാരായ പൊതുമാപ്പ് യാത്രക്കാരെ കൊണ്ടു പോവുന്നതുമായി ബന്ധപ്പെട്ട് കുവൈത്തില് നിന്നുള്ള വിമാനങ്ങള്ക്ക് ഇന്ത്യ അനുമതി നല്കിയിരുന്നില്ല. ഈ സാഹചര്യത്തിലാണ് ഇന്ത്യയില് നിന്നും വരുന്ന യാത്രാവിമാനങ്ങള്ക്ക് കുവൈത്ത് അധികൃതര് അനുമതി നല്കാതിരുന്നത്.
പ്രതിസന്ധി പരിഹരിക്കുന്നതിന് ഇരു രാജ്യങ്ങളും തമ്മില് കഴിഞ്ഞ മണിക്കൂറുകളില് തിരക്കിട്ട് ചര്ച്ച നടത്തി വരികയായിരുന്നു. പൊതുമാപ്പ് യാത്രക്കാരുടെ വിഷയത്തില് ഇന്ത്യയില് നിന്നും അനുകൂല മറുപടി ലഭിച്ചതിനെ തുടര്ന്നാണു പ്രശ്നത്തിനു പരിഹാരമുണ്ടായതെന്നാണ് സൂചന. കൊച്ചിയിലേക്ക് 80 ദിനാറാണു ടിക്കറ്റ് നിരക്ക് നിശ്ചയിച്ചിരിക്കുന്നത്. കുവൈത്തില് നിന്നും ആദ്യ ഏഴു ദിവസങ്ങളില് കേരളത്തിലേയ്ക്കു രണ്ട് വിമാനങ്ങളാണ് ക്രമീകരിച്ചിരിക്കുന്നത്. നാളത്തെ കൊച്ചി സര്വീസിനു പുറമെ കോഴിക്കോട്ടേയ്ക്ക് 13 നാണ് അടുത്ത വിമാനം.
