ന്യൂഡല്ഹി: ഡല്ഹിയെ ആശങ്കയിലാക്കി വെട്ടുക്കിളിക്കൂട്ടം ഇന്ദിരാഗാന്ധി എയര്പോര്ട്ടിന് സമീപത്തുമെത്തി. ഇതേത്തുടര്ന്ന് പൈലറ്റുമാര് ജാഗ്രത പാലിക്കണമെന്ന് എയര് ട്രാഫിക് കണ്ട്രോള് ഓഫ് ഇന്ത്യ നിര്ദ്ദേശം നല്കി. എയര്പോര്ട്ടിന് സമീപത്തെ ഗുരുഗ്രാം-ദ്വാരക എക്സ്പ്രസ് വേയിലാണ് വെട്ടുക്കിളിക്കൂട്ടം എത്തിയിരിക്കുന്നത്.
സ്ഥിതിഗതികള് വിലയിരുത്താന് എടിസി പ്രത്യേക സംഘത്തെ നിയോഗിച്ചിട്ടുണ്ട്. ടേക്ക് ഓഫ്, ലാന്റിങ് സമയത്ത് ജാഗ്രത പാലിക്കണം എന്നാണ് നിര്ദേശം. ഡല്ഹി എയര്പോര്ട്ടില് നിന്ന് ഷെഡ്യൂള് ചെയ്ത വിമാന സര്വ്വീസുകളില് മാറ്റമില്ലെന്നും എടിസി അറിയിച്ചു.
പാകിസ്ഥാനില് നിന്നെത്തിയ വെട്ടുക്കിളിക്കൂട്ടം രാജസ്ഥാന്, പഞ്ചാബ്, ഹരിയാന, മധ്യപ്രദേശ് എന്നീ സംസ്ഥാനങ്ങള് താണ്ടിയാണ് തലസ്ഥാനത്തെത്തിയിരിക്കുന്നത്.
കഴിഞ്ഞ കുറെ ആഴ്ചകളായി രാജ്യത്തെ കര്ഷകര് വെട്ടുക്കിളികളുടെ ഭീഷണി നേരിടുകയാണ്. കാര്ഷിക വിളകള് തിന്നു നശിപ്പിക്കുന്നതിനാല് വലിയ തോതിലുളള നഷ്ടം നേരിടുന്ന കര്ഷകര് നഷ്ടപരിഹാരം വേണമെന്നാവശ്യപ്പെട്ട് പ്രതിഷേധത്തിലാണ്.
