മുംബൈ : ഒരു മാസത്തിനിടെ ത്വക്ക് രോഗത്തെ തുടര്ന്ന് ചത്തത് 22 പശുക്കള്. മഹാരാഷ്ട്രയിലാണ് ലംപി ത്വക്ക് രോഗത്തെ തുടര്ന്ന് പശുക്കള് ചത്തത്. മഹാരാഷ്ട്രയില് ജല്ഗാവ്, അഹമ്മദ്നഗര്, അകോല, ധൂലെ, പൂനെ, ലാത്തൂര്, ഔറംഗബാദ്, ബീഡ്, സത്താറ, ബുല്ദാന, അമരാവതി, ഒസ്മാനാബാദ്, കോലാപൂര് ജില്ലകളിലെ 133 ഗ്രാമങ്ങളില് രോഗം പടര്ന്നതായി അധികൃതര് അറിയിച്ചു.
രോഗബാധിത പ്രദേശങ്ങളുടെ 5 കിലോമീറ്റര് ചുറ്റളവിലുള്ള 622 ഗ്രാമങ്ങളിലെ മൊത്തം 2,21,090 കന്നുകാലികള്ക്ക് കുത്തിവയ്പ്പ് നല്കിയിട്ടുണ്ട്. രോഗബാധിതരായ 1,224 കന്നുകാലികളില് 752 എണ്ണം സുഖം പ്രാപിച്ചു. 22 എണ്ണം ഇതുവരെ ചത്തു എന്നും അധികൃതര് പറഞ്ഞു. അതേസമയം പകര്ച്ചവ്യാധികള് തടയുന്നതിനും നിയന്ത്രിക്കുന്നതിനും ഉള്ള മാനദണ്ഡം അനുസരിച്ച് അണുബാധയുടെ പ്രഭവകേന്ദ്രത്തില് നിന്ന് 5 കിലോമീറ്റര് വരെയുള്ള പ്രദേശം നിയന്ത്രിത മേഖലയായി പ്രഖ്യാപിക്കും.
ആഗസ്റ്റ് നാലിന് ജല്ഗാവിലെ റാവര് താലൂക്കിലെ ചിനാവാള് ഗ്രാമത്തിലാണ് സംസ്ഥാനത്തെ ആദ്യത്തെ രോഗബാധ റിപ്പോര്ട്ട് ചെയ്തത്.പനി, മൂക്കൊലിപ്പ്, ലാക്രിമല് ഡിസ്ചാര്ജ്, കണ്ണിലെ അള്സര്, ലിംഫ് നോഡുകള് വീര്ക്കുക, പാലുല്പാദനം കുറയുക എന്നിവയാണ് രോഗത്തിന്റെ പ്രധാന ലക്ഷണങ്ങള്. രോഗം പകര്ച്ചവ്യാധിയായതിനാല്, പശുത്തൊഴുത്തിന്റെ ശരിയായ ശുചീകരണം, ആരോഗ്യമുള്ള മൃഗങ്ങളെ രോഗബാധിതരില് നിന്ന് വേര്തിരിക്കുക തുടങ്ങിയ പ്രതിരോധ നടപടികള് സ്വീകരിക്കേണ്ടത് പ്രധാനമാണ്. രാജസ്ഥാന്, ഗുജറാത്ത്, പഞ്ചാബ്, ഹരിയാന, ഹിമാചല് പ്രദേശ്, ഉത്തരാഖണ്ഡ്, ജമ്മു-കശ്മീര്, ഉത്തര്പ്രദേശ്, മധ്യപ്രദേശ്, ഡല്ഹി എന്നിവിടങ്ങളിലാണ് മുമ്ബ് ഈ രോഗം റിപ്പോര്ട്ട് ചെയ്യപ്പെട്ടിട്ടുള്ളത്.