തിരുവനന്തപുരം : മുതലപ്പൊഴി അപകടത്തില് ഇനി കണ്ടെത്താനുള്ളത് 3 പേരെ. മുസ്തഫ, ഉസ്മാന്, സമദ് എന്നിവരെയാണ് കണ്ടെത്താനുള്ളത്. ബോട്ടില് ഉണ്ടായിരുന്നത് ആകെ 23 മത്സ്യത്തൊഴിലാളികളാണ്. ഇതില് രണ്ട് പേര് മരിച്ചിരുന്നു. വര്ക്കല സ്വദേശികളായ ഷാനവാസ്, നിസാം എന്നിവരാണ് മരിച്ചത്. ഒരാളുടെ നില ഗുരുതരമായി തുടരുകയാണ്. പ്രതികൂല കാലാവസ്ഥ കാരണം മണിക്കൂറുകളായി രക്ഷാപ്രവര്ത്തനം നിര്ത്തിവെച്ചിരിക്കുകയാണ്.
മുതലപ്പൊഴിയില് നിന്ന് 23 പേരുമായി മത്സ്യബന്ധനത്തിന് പോയ വള്ളമാണ് ഇന്ന് ഉച്ചയോടെ അപകടത്തില് പെടുന്നത്. കരയിലേക്ക് തിരിച്ചുവരുന്നതിനിടെ സഫ മര്വ എന്ന ബോട്ടാണ് തിരയില് പെട്ട് മറിഞ്ഞത്. മറ്റ് ബോട്ടുകളിലായെത്തിയ മത്സ്യത്തൊഴിലാളികള് 9 പേരെ രക്ഷപ്പെടുത്തി.
