കായംകുളം : ഇരുചക്ര വാഹന യാത്രക്കാരെ പിന്തുടര്ന്ന് ആക്രമിച്ച് മൊബൈല് ഫോണുകളും പണവും കവരുന്ന സംഘത്തെ പോലീസ് പിടികൂടി. കൊല്ലം തട്ടാമല ഫാത്തിമ മന്സിലില് മാഹീന് (20), ഇരവിപുരം വാളത്തുംഗല് മുതിര അയ്യത്ത് വടക്കതില് സെയ്ദലി (21), ഇരവിപുരം കൂട്ടിക്കട അല്ത്താഫ് മന്സിലില് അസറുദ്ദീന് (അച്ചു 21), കൊല്ലം മയ്യനാട് അലി ഹൗസില് മുഹമ്മദ് ഷാന് (25), കൊല്ലം മുളവന വില്ലേജില് കുണ്ടറ ആശുപത്രി ജങ്ഷനു സമീപം ഫര്സാന മന്സിലില് ഫര്ജാസ് (യാസീന് -19), കൊല്ലം മണക്കാട് വടക്കേവിള തൊടിയില് വീട്ടില് മുഹമ്മദ് തൗഫീഖ് (18) എന്നിവരാണ് അറസ്റ്റിലായത്.
ഇരുചക്രവാഹന യാത്രക്കാരുടെ ഇടത് വശത്തുകൂടി ബൈക്കില് പിന്തുടര്ന്ന് പുറത്ത് അടിച്ചശേഷം പോക്കറ്റില്നിന്ന് മൊബൈല് കവര്ന്ന്, അമിത വേഗത്തില് കടന്നുകളയുന്നതാണ് ഇവരുടെ രീതി. കഴിഞ്ഞ 16ന് കരീലക്കുളങ്ങര സ്റ്റേഷനിലെ പോലീസുകാരനായ സജീവനെ സംഘം ആക്രമിച്ചിരുന്നു. ഡ്യൂട്ടി കഴിഞ്ഞ് രാത്രി എട്ടോടെ വീട്ടിലേക്ക് മടങ്ങുമ്പോഴായിരുന്നു അജന്ത ജങ്ഷനില്വെച്ച് സജീവന് ആക്രമണത്തിന് ഇരയായത്. ചേപ്പാട് വച്ചു ഒരു വിമുക്ത ഭടന്റെ മൊബൈല് ഫോണ് തട്ടിപ്പറിക്കുന്നതിനിടയില് അദ്ദേഹത്തിന്റെ ബൈക്ക് വേറൊരു ബൈക്കില് കൂട്ടിയിടിച്ച് അപകടം സംഭവിച്ചിരുന്നു. സമാന രീതിയില് കരീലക്കുളങ്ങരയിലും കൊല്ലം ശക്തികുളങ്ങരയിലും കവര്ച്ച നടത്തിയതിന് ഇവര്ക്കെതിരെ കേസുകളുണ്ട്.
പോലീസുകാരനും ആക്രമണത്തിന് ഇരയായതോടെയാണ് അന്വേഷണം ഊര്ജിതമായത്. തുടര്ച്ചയായി നടക്കുന്ന ഇത്തരം സംഭവത്തില് ആലപ്പുഴ ജില്ലാ പോലീസ് മേധാവിയുടെ നിര്ദ്ദേശപ്രകാരം കായംകുളം ഡി.വൈ.എസ്.പി അലക്സ് ബേബിയുടെ നേതൃത്വത്തില് പ്രത്യേക അന്വേഷണ സംഘം രൂപീകരിച്ച് അന്വേഷണം നടത്തി വരികയായിരുന്നു. കരീലക്കുളങ്ങര മുതല് കൊല്ലം വരെയുള്ള വിവിധ സിസി ടിവി ദൃശ്യങ്ങളും നിരവധി ഫോണ് കോളുകളും മറ്റും പരിശോധിച്ചാണ് പ്രതികളെ അറസ്റ്റ് ചെയ്തത്. സി.ഐമാരായ മുഹമ്മദ് ഷാഫി, സുധിലാല്, എസ്.ഐ ഗിരീഷ്, പോലീസുകാരായ രജീദ്രദാസ്, ഗിരീഷ്, ഷാജഹാന്, ദീപക്, വിഷ്ണു, അനീഷ്, ഫിറോസ്, നിഷാദ്, മണിക്കുട്ടന്, ഇയാസ്, അരുണ് എന്നിവരാണ് പ്രതികളെ പിടികൂടിയത്.