റാന്നി : മാറിക്കൊണ്ടിരിക്കുന്ന കാലഘട്ടത്തിൽ വായനശാലകളുടെ പങ്ക് വലുതാണെന്നും സമൂഹത്തിന്റെ സാംസ്കാരിക മുന്നേറ്റത്തിനായി ഗ്രന്ഥശാലാ പ്രവർത്തനങ്ങൾ കൂടുതൽ മെച്ചപ്പെടുത്തുവാൻ ഭാരവാഹികളും പ്രവർത്തകരും തയ്യാറാകണമെന്നും സംസ്ഥാന ലൈബ്രറി കൗണ്സില് എക്സിക്യൂട്ടീവംഗം പി.ആർ. പ്രസാദ് പറഞ്ഞു. റാന്നി താലൂക്ക് ലൈബ്രറി കൗൺസിലിന്റെ നേതൃത്വത്തില് സംഘടിപ്പിച്ച ലൈബ്രറി സംഗമം ഉദ്ഘാടനം ചെയ്യുകയായിരുന്നു അദ്ദേഹം. ഗ്രന്ഥശാലാ പ്രവര്ത്തനങ്ങള് കൂടുതല് ജനകീയവും സജീവവുമാക്കുക എന്ന ലക്ഷ്യത്തോടെ വേണം ഓരോ ചുവടും വെക്കുവാൻ. വായന മാത്രമായി ചുരുക്കാതെ കലാ സാംസ്ക്കാരിക രംഗത്തും ആവശ്യമായ ഇടപെടലും പരിശീലനവും നൽകുവാൻ ഓരോ ഗ്രന്ഥശാലകളും തയ്യാറാകണമെന്നും അദ്ദേഹം ആവശ്യപ്പെട്ടു.
താലൂക്ക് പ്രസിഡന്റ് എം.വി പ്രസന്നകുമാര് അധ്യക്ഷത വഹിച്ചു. ജില്ലാ പ്രസിഡന്റ് കെ.പി രാധാകൃഷ്ണന് ഭാവി പദ്ധതികൾ വിശദീകരണം നടത്തി. താലൂക്ക് സെക്രട്ടറി പ്രൊഫസര് വി.ആർ വിശ്വനാഥൻ നായർ റിപ്പോർട്ടും കണക്കും അവതരിപ്പിച്ചു. ജില്ലാ എക്സിക്യൂട്ടീവംഗം കോമളം അനിരുദ്ധൻ, താലൂക്ക് ജോയിന്റ് സെക്രട്ടറി പി.ആർ സജീവ്, താലൂക്ക് എക്സിക്യൂട്ടീവംഗങ്ങളായ പി.കെ പ്രഭാകരൻ, എസ്.അജിത്ത്, തോമസ് ടി.ശാമുവേൽ, കവി പി. ചന്ദ്രമോഹൻ, വി.എം പ്രകാശ്, സി.എൻ ശിവൻകുട്ടി നായർ, ഭദ്രൻ കല്ലയ്ക്കൽ, വി.എസ് മോഹൻ, ജോൺസൻ മാത്യു, ടി.വി ജോർജ്, നന്ദകുമാർ, സുനിൽ ഉതിമൂട് എന്നിവർ പ്രസംഗിച്ചു.
