അത്തിക്കയം : എസ്.എൻ.ഡി.പി. യോഗം 362-ാം നമ്പര് അത്തിക്കയം ശാഖയുടെ ആഭിമുഖ്യത്തിലുള്ള ശ്രീനാരായണ ഗുരുദേവ ക്ഷേത്രത്തിലെ 11-ാമത് പ്രതിഷ്ഠാ വാർഷിക മഹോത്സവം സമാപിച്ചു. കോരുത്തോട് പി.വി. വിനോദ് തന്ത്രിയുടെ മുഖ്യ കാർമ്മികത്വത്തിലാണ് ചടങ്ങുകൾ നടന്നത്. ശാഖാ കുടുംബയോഗങ്ങൾ, വനിതാസംഘം, യൂത്ത് മൂവ്മെന്റ്, ബാലജനയോഗം എന്നിവര് നേതൃത്വം നല്കി. രാവിലെ പള്ളിയുണർത്തൽ, ഗണപതിഹോമം, ഗുരുപൂജ, കലശപൂജ എന്നിവയോടെ തുടക്കമായി. രാവിലെ 9 ന് ദർശന പ്രാധാന്യമുള്ള കലശാഭിഷേകത്തെ തുടർന്ന് സർവൈശ്വര്യപൂജ, ഭഗവത് സേവ, മഹാഗുരുപൂജ എന്നിവയും ഉച്ചയ്ക്ക് 11 മുതൽ മഹാ പ്രസാദമൂട്ടും നടന്നു.
പഠന ക്ലാസിൽ പങ്കെടുത്ത കുട്ടികൾക്കുള്ള അനുമോദനവും സർട്ടിഫിക്കറ്റ് വിതരണവും നടന്നു. വൈകിട്ട് ശിങ്കാരി മേളത്തോടെ ക്ഷേത്രാങ്കണത്തിൽ നിന്നും ആരംഭിച്ച ഘോഷയാത്രയിൽ താലപ്പൊലി, രഥം, മുത്തുക്കുടകൾ, വാദ്യമേളങ്ങൾ, കൈകൊട്ടിക്കളി എന്നിവ ഉണ്ടായിരുന്നു. അറയ്ക്കമൺ ഗുരുമന്ദിരത്തിലെ സ്വീകരണം ഏറ്റുവാങ്ങി 6.30-ഓടെ ഘോഷയാത്ര ക്ഷേത്രത്തിൽ എത്തിച്ചേർന്നു. തുടർന്ന് ദീപാരാധനയ്ക്ക് ശേഷം തിരുവാതിരയും ഗാനോത്സവവും നടന്നു.
