പീരുമേട് : കാലാവധി കഴിഞ്ഞ ലൈസന്സുമായി ബസ് ഓടിച്ചു വന്ന സ്വകാര്യ ബസ് ഡ്രൈവറെ ഒഴിവാക്കിയ ശേഷം ബസിന്റെ നിയന്ത്രണം ഏറ്റെടുത്ത് മോട്ടര് വാഹന വകുപ്പ് ഉദ്യോഗസ്ഥന്. വാഗമണ്- ഏലപ്പാറ റൂട്ടില് കോലാഹലമേട്ടില് മോട്ടോര് വാഹന വകുപ്പ് പരിശോധന നടത്തുന്നതിനിടെയാണ് സംഭവം. കുമളിയില് നിന്ന് വാഗമണ്ണിലേക്ക് പോയ ബസിലെ ഡ്രൈവറാണ് കാലാവധി തീര്ന്ന ലൈസന്സുമായി ബസ് ഓടിച്ചിരുന്നത്.
2021 നവംബറില് ഇയാളുടെ ലൈസന്സിന്റെ കാലാവധി അവസാനിച്ചിരുന്നു. തുടര്ന്ന് ബസിന്റെ ട്രിപ്പ് മുടങ്ങാതിരിക്കാന് ലൈസന്സ് ഇല്ലാത്ത ഡ്രൈവറെ ഒഴിവാക്കി എംവിഐ വി അനില് കുമാര് ബസ് ഓടിച്ച് യാത്രക്കാരെ വാഗമണ്ണില് എത്തിച്ചു. പിന്നീട് മറ്റൊരു ഡ്രൈവര് എത്തി ബസ് സര്വീസ് പുനരാരംഭിക്കുകയും ചെയ്തു. കുട്ടിക്കാനം ഏലപ്പാറ വാഗമണ് ഭാഗങ്ങളില് നടത്തിയ വാഹന പരിശോധനയില് 35 വാഹനങ്ങള്ക്കെതിരെ നടപടിയെടുക്കുകയും ഒന്നര ലക്ഷത്തോളം പിഴ ഈടാക്കുകയും ചെയ്തുവെന്ന് അധികൃതര് പറഞ്ഞു.