ആൾമറയില്ലാത്ത കിണറ്റിൽ വീണ് വീട്ടമ്മ മരിച്ചു

കീഴ്വായ്പൂര് : ആൾമറയില്ലാത്ത കിണറ്റിൽ വീണ് വീട്ടമ്മ മരിച്ചു. കീഴ് വായ്പൂര് കുളമാവുങ്കൽ അനിൽ കുട്ടന്റെ ഭാര്യ ദിവ്യമോൾ (35) ആണ് മരിച്ചത്. ഞായറാഴ്ച രാത്രി എട്ടേകാലോടെ ഐക്കുന്ന് ശുഭാനന്ദാശ്രമത്തിന് സമീപമാണ് അപകടം. ഉത്സവത്തിനിടെ ഭക്ഷണം വിളമ്പുന്നതിന് പാത്രം എടുക്കാൻ പോയ ഇവർ കിണറ്റിൽ വീണതായിട്ടാണ് കരുതുന്നത്. മല്ലപ്പള്ളി താലൂക്ക് ആശുപത്രിയിലെത്തിച്ചെങ്കിലും രക്ഷിക്കാനായില്ല. കവിയൂർ തൂമ്പുങ്കൽ ഗോപിയുടെയും ഭാരതിയുടെയും മകളാണ് ദിവ്യ. മക്കൾ: അഭിലാഷ്, അഭിനന്ദ്. സംസ്കാരം പിന്നീട്.