കോഴിക്കോട് : ലൈഫ് കരട് ഗുണഭോക്തൃ പട്ടികയില് ആക്ഷേപമുള്ളവര് ഈ മാസം 17നുള്ളില് ഓണ്ലൈനായി അറിയിക്കണമെന്ന് മന്ത്രി എം.വി ഗോവിന്ദന് അറിയിച്ചു. ഈമാസം 10ന് പ്രസിദ്ധീകരിച്ച പട്ടികയില് 14 ന് ഉച്ചയ്ക്ക് രണ്ട് വരെ 11,196 അപ്പീലുകള് ലഭിച്ചു. ഭൂമിയുള്ള ഭവനരഹിതരുടെ 9533 അപ്പീലുകളും ഭൂമിയില്ലാത്ത ഭവനരഹിതരുടെ 1663 അപ്പീലുകളുമാണ് ലഭിച്ചത്. www.life2020.kerala.gov.in എന്ന വെബ്സൈറ്റില് ലോഗിന് ചെയ്താണ് അപ്പീല് നല്കേണ്ടത്.
നിലവില് പ്രസിദ്ധീകരിച്ചിരിക്കുന്ന മുന്ഗണനാ പട്ടികയില് വസ്തുതകളുടെ അടിസ്ഥാനത്തില് മാത്രമേ, തദ്ദേശ സ്വയം ഭരണ സ്ഥാപനത്തിനും ഗ്രാമസഭകള്ക്കും മാറ്റം വരുത്താനാവൂ. അതിനാല് മുന്ഗണനാ ക്രമത്തില് അപാകത ഉണ്ടെങ്കില് ഗുണഭോക്താക്കള് അപ്പീല് നല്കേണ്ടത് അനിവാര്യമാണ്. ഭൂരഹിതരായവര് ഭൂമി ഉള്ളവരുടെ പട്ടികയിലേക്കോ തിരിച്ചോ മാറുന്നതിനും അപ്പീല് നല്കാന് അവസരമുണ്ട്. വാര്ഡ്, തദ്ദേശ സ്വയം ഭരണ സ്ഥാപനം എന്നിവ മാറാനും അപ്പീല് നല്കാം.
ഏറ്റവും അര്ഹരായവര്ക്ക് തന്നെ ആനുകൂല്യം ലഭിക്കുന്നുവെന്ന് ഉറപ്പാക്കാന് അപ്പീല്/ ആക്ഷേപം നല്കാനുള്ള അവസരം കൃത്യമായി വിനിയോഗിക്കണമെന്ന് മന്ത്രി നിര്ദേശിച്ചു. ആദ്യഘട്ട പരിശോധനയ്ക്ക് ശേഷമുള്ള പട്ടിക ജൂലൈ ഒന്നിന് പ്രസിദ്ധീകരിക്കും. കലക്ടര് അധ്യക്ഷനായ കമ്മിറ്റിക്ക് മുന്പില് ജൂലൈ എട്ടു വരെ രണ്ടാം ഘട്ടം അപ്പീല് ഓണ്ലൈനില് നല്കാനും അവസരമുണ്ടാകും. ആഗസ്റ്റ് 16 നാണ് അന്തിമ പട്ടിക പ്രസിദ്ധീകരിക്കുന്നത്.