പെരുമ്പാവൂര്‍ : എല്‍ദോസ് കുന്നപ്പിള്ളി എംഎല്‍എയ്ക്ക് ഭീഷണിക്കത്ത്. കിറ്റെക്സ് വിഷയത്തില്‍ ഇടപെട്ടാല്‍ ബോംബെറിഞ്ഞു തകര്‍ക്കുമെന്നാണ് ഭീഷണി. വെള്ളിയാഴ്ച ഉച്ചയോടെ പെരുമ്ബാവൂരിലെ എംഎല്‍എ ഓഫീസിലാണ് അജ്ഞാത ഭീഷണി കത്ത് എത്തിയത്. വെങ്ങോലയിലെ ഐഎസ് അംഗമാണെന്നു വ്യക്തമാക്കുന്നുണ്ട്. കത്തില്‍ പിടി തോമസ് എംഎല്‍എ, ബെന്നി ബഹന്നാന്‍, ഉമ്മന്‍ ചാണ്ടി തുടങ്ങിയവര്‍ക്കെല്ലാം എതിരെ രൂക്ഷമായ അസഭ്യ വര്‍ഷം നടത്തിയിട്ടുണ്ട്.
പെരുമ്ബാവൂര്‍ എംഎല്‍എ കുന്നത്തുനാട് മണ്ഡലത്തിലെ കാര്യം അന്വേഷിക്കാന്‍ നടക്കേണ്ടെന്നു തുടങ്ങുന്ന കത്തില്‍ പിന്നെ അസഭ്യവര്‍ഷമാണ്. ചേലക്കുളം സ്വദേശി കാച്ചാംകുഴി അബ്ദുല്‍ റഹ്മാന്റെ പേരിലാണ് കത്തയച്ചിരിക്കുന്നത്. വെങ്ങോല ചേലക്കുളത്തുള്ള ഒരു വിലാസം കത്തില്‍ വച്ചിട്ടുണ്ട്. ഇത് ശരിയായ വിലാസമാണോ എന്നു സ്ഥിരീകരിച്ചിട്ടില്ല. കത്ത് ലഭിച്ച എംഎല്‍എ മുഖ്യമന്ത്രിക്കും പോലീസിനും പരാതി നല്‍കി. എല്‍ദോസ് കുന്നപ്പിള്ളിയ്ക്ക് പുറമെ പി.ടി. തോമസ് എംഎല്‍എയ്ക്കും ബെന്നി ബഹനാന്‍ എംപിക്കുമെതിരേ കത്തില്‍ പരാമര്‍ശമുണ്ട്.
എല്‍ദോസിനെ പെരുമ്ബാവൂര്‍ എംഎല്‍എ ആയാണ് തെരഞ്ഞെടുത്തിരിക്കുന്നത്. കിഴക്കമ്ബലം പഞ്ചായത്ത് ട്വന്റി ട്വന്റി ആണ് ഭരിക്കുന്നത്. കിഴക്കമ്ബലത്തെ കോണ്‍ഗ്രസുകാരുടെ കയ്യിലിരിപ്പുകൊണ്ടാണ് അങ്ങനെ വന്നത്. പിടി തോമസ് കാളപെറ്റെന്നു പറഞ്ഞാല്‍ കയറെടുക്കുന്ന ആളാണ്. തോമസ് വിചാരിച്ചാല്‍ ട്വന്റി ട്വന്റിയെ ഒന്നും ചെയ്യാനാവില്ലെന്നും കത്തില്‍ അവകാശപ്പെടുന്നു.
യുഡിഎഫിലെ 41 എംഎല്‍എമാര്‍ക്കും കത്തയച്ചിട്ടുണ്ടെന്നും ശേഷം അടുത്ത കത്തില്‍ എന്നു പറഞ്ഞാണ് ഏഴുത്ത് അവസാനിപ്പിച്ചിരിക്കുന്നത്. കത്ത് സാമൂഹിക മാധ്യമത്തില്‍ ഇടണമെന്നും ആവശ്യപ്പെട്ടിട്ടുണ്ട്. കൈപ്പടയില്‍ എഴുതിയ കത്തായതിനാല്‍ പ്രതിയെ പിടികൂടാം എന്നാണ് പോലീസ് പ്രതീക്ഷിക്കുന്നത്.
