കൊച്ചി: കേരളത്തിന്റെ വിവിധ ഭാഗങ്ങളിലെ പോസ്റ്റ് ഓഫീസുകൾ കേന്ദ്രീകരിച്ച് തുടർച്ചയായി കവർച്ച നടത്തിയ മോഷ്ടാവ് ഒടുവിൽ പോലീസ് പിടിയിലായി. ഉത്തർപ്രദേശ് സ്വദേശിയായ ആസിഫ് റാസയാണ് പിടിയിലായത്. എറണാകുളത്ത് മറ്റൊരു കവർച്ചയ്ക്ക് പദ്ധതിയിടുന്നതിനിടെയാണ് പ്രതിയെ കടയ്ക്കൽ പോലീസ് അറസ്റ്റ് ചെയ്തത്. തിരുവനന്തപുരം, കൊല്ലം ജില്ലകളിലായി ഏഴ് പോസ്റ്റ് ഓഫീസുകളിലെ ലോക്കറുകൾ പൊളിച്ച് പണവും വിലപിടിപ്പുള്ള സാധനങ്ങളും മോഷ്ടിച്ചതായി പോലീസ് അറിയിച്ചു. കടയ്ക്കൽ പോസ്റ്റ് ഓഫീസിൽ നിന്ന് മാത്രം ഏകദേശം 1.25 ലക്ഷം രൂപ ഇയാൾ കവർന്നിരുന്നു. കേസന്വേഷണത്തിനിടെ കുണ്ടറ പോസ്റ്റ് ഓഫീസിൽ നിന്ന് കണ്ടെത്തിയ കട്ടിങ് മെഷീന്റെ ഗ്യാരണ്ടി കാർഡാണ് അന്വേഷണത്തിൽ നിർണായക തെളിവായത്. ആ രേഖ പിന്തുടർന്നാണ് പോലീസ് പ്രതിയെ തിരിച്ചറിഞ്ഞത്.
തുടർന്ന് നടത്തിയ അന്വേഷണത്തിൽ എറണാകുളത്ത് ഒരു പോസ്റ്റ് ഓഫീസിന് സമീപത്തെ ലോഡ്ജിൽ മുറിയെടുത്ത് താമസിച്ച് അടുത്ത മോഷണത്തിന് തയ്യാറെടുക്കുന്നതിനിടെയാണ് കടയ്ക്കൽ പോലീസ് ഇയാളെ പിടികൂടിയത്. പ്രതിക്കെതിരെ സംസ്ഥാനത്തിന്റെ വിവിധ ഭാഗങ്ങളിലെ സമാന മോഷണങ്ങളിൽ പങ്കുണ്ടോയെന്ന് പോലീസ് വിശദമായ അന്വേഷണം നടത്തുകയാണ്.
