പത്തനംതിട്ട : യോഗയിലൂടെ ജീവിതശൈലി രോഗങ്ങളെ പ്രതിരോധിക്കുവാനും ശാരീരിക മാനസിക ഊര്ജം വീണ്ടെടുക്കാനും സാധിക്കുമെന്ന് ജില്ലാ കളക്ടര് എസ് പ്രേം കൃഷ്ണന്. ആയുഷ് വകുപ്പും ദേശീയ ആയുഷ് മിഷനും സംയുക്തമായി സംഘടിപ്പിച്ച 11 -ാം അന്താരാഷ്ട്ര യോഗദിനാചരണം ജില്ലാതല ഉദ്ഘാടനം കളക്ടറേറ്റ് കോണ്ഫറന്സ് ഹാളില് നിര്വഹിക്കുകയായിരുന്നു അദ്ദേഹം. ദിനാചരണത്തില് ഒതുങ്ങാതെ യോഗയെ ജീവിതത്തിന്റെ ഭാഗമാക്കണം. ആരോഗ്യ സംരക്ഷണത്തിനായി ദിവസവും സമയം കണ്ടെത്തണമെന്നും ജില്ലാ കളക്ടര് വ്യക്തമാക്കി.
ഭാരതീയ ചികിത്സാ വകുപ്പ് ജില്ലാ മെഡിക്കല് ഓഫീസര് ഡോ. ആര് കൃഷ്ണകുമാര് അധ്യക്ഷത വഹിച്ചു. ജില്ലാ മെഡിക്കല് ഓഫീസര് (ഹോമിയോപ്പതി) ഡോ. ബിജു കുമാര് മുഖ്യപ്രഭാഷണം നടത്തി. യോഗ വെല്നസ് മെഡിക്കല് ഓഫീസര് ഡോ. അരുണ് തുളസി ക്ലാസ് നയിച്ചു. യോഗയിലെ ദേശീയ സ്വര്ണ മെഡല് ജേതാവ് രേവതി രാജേഷിനെ എഡിഎം ബി ജ്യോതി ആദരിച്ചു. ഡെപ്യൂട്ടി കലക്ടര് മിനി തോമസ്, ജില്ലാ പ്രോഗ്രാം മാനേജര് ഡോ. എസ് അഖില, യോഗ ഇന്സ്ട്രക്ടര് ശ്രീജേഷ് വി കൈമള് എന്നിവര് പങ്കെടുത്തു.
