തിരുവനന്തപുരം: തിരഞ്ഞെടുപ്പു നടന്ന 1199 തദ്ദേശ സ്ഥാപനങ്ങളില് 8 എണ്ണം ഒഴികെയുള്ളവയിലെ അംഗങ്ങളുടെ സത്യപ്രതിജ്ഞ 21 നു നടക്കും. ഭരണസമിതിയുടെ കാലാവധി 21നു മുന്പ് പൂര്ത്തിയാകുന്നവയാണ് ഇവ. മലപ്പുറം ജില്ലയിലെ എട്ടിടങ്ങളില് കാലാവധി 20നു ശേഷമാണ് പൂര്ത്തിയാകുക. ഇവിടെ സത്യപ്രതിജ്ഞ 22 മുതല് ഫെബ്രുവരി 1 വരെ തീയതികളിലാവും. ഇത് സംബന്ധിച്ച മാര്ഗനിര്ദ്ദേശങ്ങള് തെരഞ്ഞെടുപ്പ് കമ്മീഷന് പുറപ്പെടുവിച്ചു.
ജില്ല, ബ്ലോക്ക്, ഗ്രാമപ്പഞ്ചായത്തുകളിലെ ആദ്യ അംഗത്തെ സത്യപ്രതിജ്ഞ ചെയ്യിക്കുന്നത് അതതു വരണാധികാരികളാണ്. ഒന്നില് കൂടുതല് വരണാധികാരികളുള്ള മുനിസിപ്പാലിറ്റികളില് പ്രത്യേകം നിയോഗിക്കപ്പെട്ട വരണാധികാരിയായിരിക്കും ഇതു നിര്വഹിക്കുക. കോര്പറേഷനുകളില് കലക്ടര്മാരും. ഏറ്റവും പ്രായം കൂടിയ അംഗത്തെയാണ് ഇങ്ങനെ സത്യപ്രതിജ്ഞ ചെയ്യിക്കേണ്ടത്. മറ്റ് അംഗങ്ങള്ക്ക് ഇദ്ദേഹം പ്രതിജ്ഞ ചൊല്ലിക്കൊടുക്കും.
ഓരോ തദ്ദേശ സ്വയംഭരണ സ്ഥാപനങ്ങളിലേയ്ക്കും തെരഞ്ഞെടുക്കപ്പെട്ട അംഗങ്ങളില് ഏറ്റവും പ്രായം കൂടിയ അംഗം/കൗണ്സിലര് വരണാധികാരി മുമ്ബാകെ സത്യപ്രതിജ്ഞ ചെയ്യണം. പിന്നീട് ഇദ്ദേഹമായിരിക്കും മറ്റ് അംഗങ്ങളെ സത്യപ്രതിജ്ഞ ചെയ്യിക്കുക. തിരഞ്ഞെടുക്കപ്പെട്ട എല്ലാ അംഗങ്ങള്ക്കും പ്രതിജ്ഞ എടുക്കാന് രേഖാമൂലം അറിയിപ്പ് നല്കും.
ഗ്രാമ പഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത്, മുനിസിപ്പല് കൗണ്സിലുകള് എന്നിവിടങ്ങളില് രാവിലെ 10 മണിക്കും കോര്പ്പറേഷനുകളില് 11.30 നുമാണ് സത്യപ്രതിജ്ഞ നടപടികള് ആരംഭിക്കുക. ഗ്രാമപഞ്ചായത്തുകളില് പഞ്ചായത്ത് ഡെപ്യൂട്ടി ഡയറക്ടര്മാരും ബ്ലോക്ക് പഞ്ചായത്തുകളില് അസിസ്റ്റന്റ് ഡെവലപ്പ്മെന്റ് കമ്മീഷണര്മാരും മുനിസിപ്പാലിറ്റികളിലും കോര്പ്പറേഷനുകളിലും അതാത് തദ്ദേശസ്ഥാപനങ്ങളിലെ സെക്രട്ടറിമാരും ജില്ലാ പഞ്ചായത്തുകളില് ജില്ലാ കളക്ടര്മാരുമാണ് ആവശ്യമായ ക്രമീകരണങ്ങള് ചെയ്യുക. ചടങ്ങുകള് ഏകോപിപ്പിച്ച് നടപ്പാക്കുന്നതിന്റെ പൊതു മേല്നോട്ടം അതാത് ജില്ലാ കളക്ടര്മാര്ക്കായിരിക്കും.
സത്യപ്രതിജ്ഞാ ചടങ്ങ് കഴിഞ്ഞാലുടന് തിരഞ്ഞെടുക്കപ്പെട്ട എല്ലാ അംഗങ്ങളുടേയും ആദ്യ യോഗം ചേരണം. ആദ്യം പ്രതിജ്ഞ ചെയ്ത അംഗത്തിന്റെ അധ്യക്ഷതയിലായിരിക്കണം യോഗം ചേരേണ്ടത്. സത്യപ്രതിജ്ഞാ ചടങ്ങുമായി ബന്ധപ്പെട്ട പ്രവര്ത്തനങ്ങള് സമയബന്ധിതമായി നടക്കുന്നുണ്ടെന്ന് ജില്ലാ തിരഞ്ഞെടുപ്പ് ഉദ്യോഗസ്ഥര് നിരീക്ഷിക്കുകയും കമ്മീഷന് റിപ്പോര്ട്ട് സമര്പ്പിക്കുകയും വേണം.
