പത്തനംതിട്ട : പൊതുതിരഞ്ഞെടുപ്പിനു മുന്നോടിയായി തദ്ദേശസ്വയംഭരണ സ്ഥാപനങ്ങളിലെ നിയോജകമണ്ഡലങ്ങളുടെയും വാര്ഡുകളുടെയും സംവരണക്രമം നിശ്ചയിക്കുന്നതിനുള്ള നറുക്കെടുപ്പ് ജില്ലയില് ഒക്ടോബര് 13 മുതല്. സംവരണ നിയോജകമണ്ഡലങ്ങളുടെ നറുക്കെടുപ്പ് നടത്തുന്നതിന് നിശ്ചയിച്ചിട്ടുള്ള ഗ്രാമപഞ്ചായത്തുകള് ഉള്പ്പെടുന്ന ബ്ലോക്ക് പഞ്ചായത്തുകള്ക്കായി ഒക്ടോബര് 13, ഒക്ടോബര് 14, ഒക്ടോബര് 15 തീയതികളില് രാവിലെ 10 മുതല് കളക്ടറേറ്റ് കോണ്ഫറന്സ് ഹാളിലാണ് നറുക്കെടുപ്പ്. ഒക്ടോബര് 13 ന് മല്ലപ്പള്ളി, കോന്നി, ഒക്ടോബര് 14 ന് കോയിപ്രം, പുളിക്കീഴ്, റാന്നി, ഒക്ടോബര് 15 ന് ഇലന്തൂര്, പന്തളം, പറക്കോട് ബ്ലോക്ക് പഞ്ചായത്തുകളിലെ ഗ്രാമപഞ്ചായത്തുകളിലേക്ക് നറുക്കെടുപ്പ് നടത്തും. അടൂര്, പത്തനംതിട്ട, തിരുവല്ല, പന്തളം നഗരസഭകളിലെ മുനിസിപ്പല് കൗണ്സിലുകളിലേക്കുള്ള നറുക്കെടുപ്പ് ഒക്ടോബര് 16 ന് രാവിലെ 10 മുതല് കളക്ടറേറ്റ് മിനി കോണ്ഫറന്സ് ഹാളിലാണ്.
സ്ത്രീ, പട്ടികജാതി സ്ത്രീ, പട്ടികവര്ഗ സ്ത്രീ, പട്ടികജാതി, പട്ടികവര്ഗം എന്നീ വിഭാഗങ്ങള്ക്ക് സംവരണം ചെയ്തിട്ടുള്ളത്രയും എണ്ണം സ്ഥാനങ്ങള് ആവര്ത്തനക്രമമനുസരിച്ച് ഏത് നിയോജകമണ്ഡലങ്ങള്, വാര്ഡുകള്ക്കാണ് നല്കേണ്ടതെന്ന് തീരുമാനിക്കുന്നതിനാണ് നറുക്കെടുപ്പ്. ഗ്രാമ, ബ്ലോക്ക്, ജില്ല പഞ്ചായത്തുകളുടെ സംവരണം നിശ്ചയിക്കുന്നതിന് ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കളക്ടറെയും മുനിസിപ്പല് കൗണ്സിലുകളിലേതിന് അതാത് തദ്ദേശസ്വയംഭരണവകുപ്പ് ജില്ലാ ജോയിന്റ് ഡയറക്ടര്മാരെയും അധികാരപ്പെടുത്തി വിജ്ഞാപനം പുറപ്പെടുവിച്ചിട്ടുണ്ട്. ബ്ലോക്ക് പഞ്ചായത്തുകളിലെ നിയോജകമണ്ഡലങ്ങളുടെ സംവരണം നിശ്ചിയിക്കുന്നതിനുള്ള നറുക്കെടുപ്പ് ഒക്ടോബര് 18 രാവിലെ 10 ന് കളക്ടറേറ്റ് കോണ്ഫറന്സ് ഹാളിലാണ്. ജില്ല പഞ്ചായത്തിലെ നിയോജകമണ്ഡലങ്ങളുടെ സംവരണം നിശ്ചയിക്കുന്നതിനുള്ള നറുക്കെടുപ്പ് ഒക്ടോബര് 21 രാവിലെ 10 ന് കളക്ടറേറ്റ് കോണ്ഫറന്സ് ഹാളില് നടക്കും.
