പത്തനംതിട്ട : ലോറി മോഷ്ടാക്കൾ പോലീസ് പിടിയിൽ. തൊടുപുഴ മുതലക്കോടം ചെരിപുറത്ത് വീട്ടിൽ അനസ് അബ്ബാസ് (41), തൊടുപുഴ കരിക്കോട് മേലേപറമ്പിൽ വീട്ടിൽ ഷിയാസ് (46) എന്നിവരാണ് പെരുമ്പാവൂർ പോലീസിന്‍റെ പിടിയിലായത്. പെരുമ്പാവൂർ എം.സി റോഡിനോട് ചേർന്നുള്ള റിലയൻസ് പെട്രോൾ പമ്പിന്‍റെ പാർക്കിംഗ് ഏരിയയിൽ പാർക്ക് ചെയ്തിരുന്ന കോട്ടയം മീനച്ചിൽ സ്വദേശിയായ അശ്വിനികുമാർ എന്നയാളുടെ ലോറിയാണ് ഇവർ മോഷ്ടിച്ച് കൊണ്ടുപോയത്.
മോഷണത്തെ തുടർന്ന് എറണാകുളം റൂറൽ ജില്ലാ പോലീസ് മേധാവി കെ. കാർത്തിക്കിന്‍റെ നേതൃത്വത്തിൽ പ്രത്യേക സംഘം രൂപികരിച്ച് അമ്പേഷണം നടത്തി വരുന്നതിനിടെയാണ് ഇവർ പിടിയിലാകുന്നത്. പിടിയിലായ പ്രതികളിൽ അനസ് അബ്ബാസിനെതിരെ തൊടുപുഴ, കരിമണ്ണൂർ, കരിംങ്കുന്നം എന്നീ പോലീസ് സ്‌റ്റേഷനുകളിൽ മോഷണം അടക്കം നിരവധി കേസുകളുണ്ട്.
അന്വേഷണ സംഘത്തിൽ ഇൻസ്പെക്ടർ രഞ്ജിത്ത്, സബ്ബ് ഇൻസ്പെക്ടർമാരായ ജോസ്സി.എം.ജോൺസൺ, റിൻസ്.എം.തോമസ്, എ.എസ്.ഐ സുരേഷ്, എസ്.സി.പി.ഒ മാരായ അഷറഫ്, അഭിലാഷ്, ജിഞ്ചു.കെ.മത്തായി എന്നിവരും ഉണ്ടായിരുന്നു. കോടതിയിൽ ഹാജരാക്കിയ പ്രതികളെ റിമാന്‍റ് ചെയ്തു.
