കൊച്ചി: നയതന്ത്ര ചാനല് വഴിയുള്ള സ്വര്ണക്കടത്തുമായി ബന്ധപ്പെട്ട് കസ്റ്റംസ് രജിസ്റ്റര് ചെയ്ത കേസില് മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം ശിവശങ്കര് ഹൈക്കോടതിയില് മുന്കൂര് ജാമ്യാപേക്ഷ നല്കി. ഓണ്ലൈനായിട്ടാണ് ജാമ്യാപേക്ഷ സമര്പ്പിച്ചിരിക്കുന്നത്. ഹര്ജി ഇന്ന് തന്നെ പരിഗണിക്കണമെന്നും അദ്ദേഹം ആവശ്യപ്പെട്ടു.
ശിവശങ്കറിന്റെ ജാമ്യാപേക്ഷയെ കസ്റ്റംസ് എതിര്ക്കുമെന്ന് സൂചന. ഇതിന്റെ ഭാഗമായി കസ്റ്റംസ് വിശദമായ റിപ്പോര്ട്ട് കോടതിയില് സമര്പ്പിക്കും.
ദേഹാസ്വാസ്ഥ്യത്തെ തുടര്ന്ന് മെഡിക്കല് കോളജ് ആശുപത്രിയില് ചികില്സയില് കഴിയുന്ന ശിവശങ്കറിന്റെ ആരോഗ്യസ്ഥിതി സംബന്ധിച്ച് വിലയിരുത്താന് ഇന്ന് മെഡിക്കല് ബോര്ഡ് യോഗം ചേരും. ഇതിനുശേഷമാകും തുടര്ചികിത്സ തീരുമാനിക്കുക.
അസ്ഥിരോഗവിഭാഗം ഐ.സി.യു.വില് കഴിയുന്ന ശിവശങ്കറിന് ശക്തമായ സുരക്ഷാസംവിധാനമാണ് ആശുപത്രി അധികൃതര് ഒരുക്കിയിട്ടുള്ളത്. ഡിസ്കിന് തകരാറല്ലാതെ, കാര്യമായ ആരോഗ്യപ്രശ്നങ്ങളൊന്നുമില്ലാത്ത ശിവശങ്കറിന് ചികിത്സയുടെ പേരില് സുരക്ഷിതതാവളം ഒരുക്കിയിരിക്കുകയാണെന്ന വിലയിരുത്തലാണ് അന്വേഷണ ഉദ്യോഗസ്ഥര് മേലുദ്യോഗസ്ഥര്ക്ക് കൈമാറിയത്.
ഡോളര് കടത്തുകേസുമായി ബന്ധപ്പെട്ട് ചോദ്യം ചെയ്യാനിരിക്കെയാണ് മുന് ഐ ടി സെക്രട്ടറി കൂടിയായ ശിവശങ്കറിന് ദേഹസ്വാസ്ഥ്യം അനുഭവപ്പെടുന്നത്. ആശുപത്രിവാസത്തിലൂടെ ജാമ്യത്തിന് കോടതിയെ സമീപിക്കാനുള്ള സാവകാശമാണ് നേടുന്നതെന്നാണ് കേന്ദ്ര ഏജന്സികളുടെ നിഗമനം. വിശ്വസ്തരായ ജീവനക്കാരല്ലാതെ ആരെയും ഈഭാഗത്തേക്ക് കടത്തിവിടുന്നില്ല.
