കൊച്ചി: മാര്ക്ക് ലിസ്റ്റ് വിവാദത്തില് വിശദീകരണവുമായി മഹാരാജാസ് കോളേജ്. എസ്എഫ്ഐ സംസ്ഥാന സെക്രട്ടറി പിഎം ആര്ഷോയ്ക്ക് എതിരായ നിലപാട് മഹാരാജാസ് കോളേജ് തിരുത്തി. ആര്ഷോ മൂന്നാം സെമസ്റ്റര് പരീക്ഷയ്ക്കായി രജിസ്റ്റര് ചെയ്തെന്ന മുന് നിലപാടാണ് മാറ്റിയത്. മാധ്യമങ്ങള്ക്ക് നല്കിയ രേഖയില് ആശയകുഴപ്പമുണ്ടെന്നാണ് കോളേജ് അധികൃതര് ഇപ്പോള് പറയുന്നത്. എന്നാല് 2021 ല് തന്നെ ആര്ഷോ റീ അഡ്മിഷന് നേടിയെന്നും അവര് പറഞ്ഞു.
അതേസമയം തനിക്കെതിരെ നടക്കുന്നത് ഗൂഢാലോചനയാണെന്ന വാദത്തില് ഉറച്ചുനില്ക്കുകയാണ് പി എം ആര്ഷൊ. വിദ്യാര്ത്ഥികള് ഡിപ്പാര്ട്ട്മെന്റ് കോര്ഡിനേറ്റര്ക്കെതിരെ പലപ്പോഴായി നല്കിയ പരാതികളും, ഡിപ്പാര്ട്ട്മെന്റിലെ കെ.എസ്.യു നേതാവായ വിദ്യാര്ത്ഥിനിയുടെ റീവാല്യൂവേഷന് റിസള്ട്ടുമായി ബന്ധപ്പെട്ട് നല്കിയ പരാതികളും സൂചിപ്പിച്ചാണ് ആര്ഷൊയുടെ പ്രതിരോധം. കര്ശനനിയമനടപടികളുമായി മുന്നോട്ട് പോകുമെന്നും ആര്ഷൊ പറയുന്നു.
