ആലപ്പുഴ: മാന്നാര് മഹാത്മ വള്ളംകളിക്കിടെ ചെറുതനചുണ്ടന്റെ അമരക്കാരനെ അപായപ്പെടുത്താന് ശ്രമിച്ച സംഭവത്തില് റിപ്പോര്ട്ട് തേടി ആഭ്യന്തര വകുപ്പ്. പോലീസ് ബോട്ട് ക്ലബിന്റെ ചുമതല ഉള്ള ഏ.ആര്.ക്യാമ്പ് ഡെപ്യൂട്ടി കമാന്ഡന്റിനോടാണ് റിപ്പോര്ട്ട് ആവശ്യപ്പെട്ടത്. പോലീസ് ബോട്ട് ക്ലബ് തുഴഞ്ഞ നിരണം ചുണ്ടനിലെ തുഴക്കാരനാണ് ചെറുതന ചുണ്ടന്റെ അമരക്കാരനെ പങ്കായം കൊണ്ട് കുത്തി വെള്ളത്തില് ഇട്ടത്. മാധ്യമ വാര്ത്തയെ തുടര്ന്നാണ് നടപടി.
കേരള പോലീസ് ബോട്ട് ക്ലബ് തുഴഞ്ഞ നിരണം ചുണ്ടനെ പിന്നിലാക്കി, ചെറുതന ചുണ്ടന് കിരീടം സ്വന്തമാക്കുമെന്നായപ്പോഴായിരുന്നു നീക്കം. ചതിയിലൂടെ ജയിച്ച പോലീസ് ബോട്ട് ക്ലബ്ബിന് ഒന്നാം സമ്മാനം നല്കരുതെന്ന് ആവശ്യപ്പെട്ട് നാട്ടുകാരും തുഴക്കാരും പ്രതിഷേധിച്ചിരുന്നു. ഇവര്ക്ക് നേരെയും പോലീസിന്റെ ആക്രമണമുണ്ടായി. പ്രതിഷേധിച്ചവരെ ക്രൂരമായി തല്ലിച്ചതച്ചുവെന്നാണ് പരാതി.
