കോന്നി : സംസ്ഥാന സിവില് സപ്ലൈസ് കോര്പ്പറേഷന്റെ ആഭിമുഖ്യത്തില് നടക്കുന്ന കോന്നി താലൂക്ക് ഓണം ഫെയര് 2026 അഡ്വ.കെ.യു ജനീഷ് കുമാര് എം.എല്.എ ഉദ്ഘാടനം ചെയ്തു. കോന്നി ഗ്രാമപഞ്ചായത്ത് പ്രസിഡന്റ് റോജി എബ്രഹാം അധ്യക്ഷത വഹിച്ചു. കോന്നി ബ്ലോക്ക് പഞ്ചായത്ത് പ്രസിഡന്റ് റോബിന് പീറ്റര് ആദ്യ വില്പന നിര്വ്വഹിച്ചു. ജില്ലാ പഞ്ചായത്ത് അംഗം എസ്.സന്തോഷ് കുമാര് വിശിഷ്ടാഥിതിയായിരുന്നു. പൊതുജനങ്ങള്ക്ക് ആവശ്യമായ പലവ്യഞ്ജനങ്ങള്, സ്റ്റേഷനറി സാധനങ്ങള്, പച്ചക്കറി, ഏത്തക്ക, മില്മ ഉല്പ്പന്നങ്ങള് തുടങ്ങി എല്ലാവിധ നിത്യോപയോഗ സാധനങ്ങളും വിവിധ ബ്രാന്ഡുകളുടെ കണ്സ്യൂമര് ഉല്പ്പന്നങ്ങളും 5% മുതല് 50 % വരെ വിലക്കുറവിലും കോമ്പോ ഓഫറുകളിലും ഇവിടെ നിന്നും ലഭിക്കുമെന്ന് അധികൃതര് അറിയിച്ചു.
കോന്നി ഗ്രാമപഞ്ചായത്ത് അംഗം ശാന്തിനി ഷിജു, സി.പി.ഐ കോന്നി മണ്ഡലം സെക്രട്ടറി എ.ദീപകുമാര്, കോണ്ഗ്രസ് കോന്നി ബ്ലോക്ക് പ്രസിഡന്റ് പ്രവീണ് പ്ലാവിളയില്, കേരളാ കോണ്ഗ്രസ് (ജേക്കബ്) നിയോജക മണ്ഡലം പ്രസിഡന്റ് കെ.ജി ഇടിക്കുള കിഴക്കേടം, സി.പി.എം കോന്നി ഏരിയ സെക്രട്ടറി ശ്യാംലാല്, മുസ്ലീം ലീഗ് ജില്ലാ സെക്രട്ടറി സി.ഐ അബ്ദുല് മുത്തലീഫ്, എന്.സി.പി സംസ്ഥാന എക്സിക്യൂട്ടീവ് അംഗം പത്മ ഗിരീഷ്, കേരള കോണ്ഗ്രസ് ഹൈ പവര് കമ്മറ്റി അംഗം ജോസ് കൊന്നപ്പാറ, ബി.ജെ.പി കോന്നി മണ്ഡലം പ്രസിഡന്റ് രഞ്ജിത്ത് മാളിയേക്കല്, സപ്ലൈക്കോ ജില്ലാ ഡിപ്പോ മാനേജര് പ്രിയ സി.ശങ്കര്, കോന്നി താലൂക്ക് സപ്ലൈ ഓഫീസര് ഹരീഷ് കെ.പിള്ള തുടങ്ങിയവര് സംസാരിച്ചു.
