തിരുവനന്തപുരം: റെയിൽവേ ട്രാക്കുകളിൽ അറ്റകുറ്റപ്പണികൾ നടക്കുന്നതിനാൽ ചില ട്രെയിനുകൾ ഭാഗികമായി റദ്ദാക്കിയതായും മറ്റുചിലത് വൈകുമെന്നും റെയിൽവേ അറിയിച്ചു. തിരുവനന്തപുരം ഡിവിഷനിലെ അറ്റകുറ്റപ്പണി കാരണം കണ്ണൂർ-എറണാകുളം ജങ്ഷൻ(16306) ഇന്റർസിറ്റി എക്സ്പ്രസ്സ് സെപ്റ്റംബർ 25,26,27 ഒക്ടോബർ 02,04,06,09,11,13 തീയതികളിൽ തൃശ്ശൂരിനും എറണാകുളത്തിനും ഇടയിൽ റദ്ദാക്കി. ഈ ദിവസങ്ങളിൽ ട്രെയിൻ തൃശ്ശൂരിൽ യാത്ര അവസാനിപ്പിക്കും. സേലം ഡിവിഷനിലെ അറ്റകുറ്റപ്പണി കാരണം കോയമ്പത്തൂർ-ഷൊർണൂർ പാസഞ്ചർ (56603) സെപ്റ്റംബർ 18, 26 തീയതികളിൽ കോയമ്പത്തൂരിനും പോത്തന്നൂരിനും ഇടയിൽ ഭാഗികമായി റദ്ദാക്കി. ഈ ദിവസങ്ങളിൽ പോത്തന്നൂർ ജങ്ഷനിൽനിന്നാകും ട്രെയിൻ പുറപ്പെടുക. ഷൊർണൂർ-കോയമ്പത്തൂർ പാസഞ്ചർ(56604) ട്രെയിനും ഈ ദിവസങ്ങളിൽ പോത്തന്നൂരിനും കോയമ്പത്തൂരിനും ഇടയിൽ റദ്ദാക്കി. ഈ ദിവസങ്ങളിൽ ട്രെയിൻ പോത്തന്നൂരിൽ യാത്ര അവസാനിപ്പിക്കും.
കോയമ്പത്തൂർ-ജബൽപൂർ വീക്ക്ലി സ്പെഷ്യൽ എക്സ്പ്രസ്സ്(02197) സെപ്റ്റംബർ 21-ന് കോയമ്പത്തൂരിനും പോത്തന്നൂരിനും ഇടയിൽ റദ്ദാക്കി. ഈ ദിവസം പോത്തന്നൂരിൽ നിന്നാകും ട്രെയിൻ യാത്രതിരിക്കുക. പാലക്കാട് ഡിവിഷനിലെ അറ്റകുറ്റപ്പണികൾ കാരണം വിവിധ ട്രെയിനുകൾ വൈകിയോടും. മംഗളൂരു സെൻട്രൽ- ചെന്നൈ സെൻട്രൽ(22638) വെസ്റ്റ് കോസ്റ്റ് എക്സ്പ്രസ്സ് സെപ്റ്റംബർ 06,08,10,13 തീയതികളിൽ 45 മിനിറ്റ് വരെ വൈകും. ഹസ്രത് നിസാമുദ്ദീൻ-എറണാകുളം മംഗള സൂപ്പർഫാസ്റ്റ് എക്സ്പ്രസ്സ്(12618) സെപ്റ്റംബർ 05,12 തീയതികളിൽ 45 മിനിറ്റ് വൈകും. ആലപ്പുഴ-കണ്ണൂർ എക്സിക്യൂട്ടീവ് എക്സ്പ്രസ്സ്(16307) ഒക്ടോബർ മൂന്നിന് 30 മിനിറ്റ് വൈകിയോടും. എറണാകുളം-പാലക്കാട് മെമു(66610) സെപ്റ്റംബർ 25-നും ഒക്ടോബർ മൂന്നിനും 35 മിനിറ്റ് വൈകും.
