കൊച്ചി : പാലാരിവട്ടം പാടിവട്ടത്ത് മെട്രോ പില്ലർ നിർമ്മാണത്തിനിടെയുണ്ടായ വൻ സുരക്ഷാവീഴ്ചയിൽ യാത്രക്കാരിക്ക് പരിക്കേറ്റു. കാക്കനാട് സ്വദേശിനിയായ ഗോപിക സഞ്ചരിച്ചിരുന്ന കാറിന് മുകളിലേക്കാണ് നിർമ്മാണത്തിലിരുന്ന പില്ലറിൽ നിന്നും ഇരുമ്പ് റോഡ് വീണത്. കഴിഞ്ഞ മെയ് 19-ന് രാത്രി 10 മണിയോടെയാണ് അപകടം നടന്നത്. മെട്രോയുടെ മുകളിൽ നിന്ന് വീണ ഇരുമ്പ് കമ്പി കാറിന്റെ വിൻഡ് ഷീൽഡ് തുളച്ചു കയറുകയായിരുന്നു. അപകടത്തിൽ ഗോപികയുടെ കൈയ്ക്ക് ചതവും തുടയിൽ മുറിവും ഏറ്റിട്ടുണ്ട്.
പെട്ടെന്നുണ്ടായ ആഘാതത്തിൽ താൻ പരിഭ്രാന്തയായെന്നും, പുറത്തിറങ്ങി നോക്കിയപ്പോൾ പില്ലറിന് മുകളിൽ നിർമ്മാണ തൊഴിലാളികളെ കണ്ടതായും ഗോപിക പറഞ്ഞു. സംഭവത്തിൽ ഗോപിക പോലീസിൽ പരാതി നൽകിയിട്ടുണ്ട്. പരാതിയെത്തുടർന്ന് പോലീസ് ഉദ്യോഗസ്ഥരും നിർമ്മാണ കമ്പനി പ്രതിനിധികളും ഗോപികയുമായി ബന്ധപ്പെട്ടു. കൊച്ചി മെട്രോ റെയിൽ ലിമിറ്റഡ് എംഡി ലോക്നാഥ് ബെഹ്റ ഗോപികയെ നേരിട്ട് ഫോണിൽ വിളിക്കുകയും സംഭവത്തിൽ കർശന നടപടി സ്വീകരിക്കുമെന്ന് ഉറപ്പ് നൽകുകയും ചെയ്തിട്ടുണ്ട്. കൊച്ചി മെട്രോയുടെ രണ്ടാം ഘട്ട നിർമ്മാണം പുരോഗമിക്കുന്ന സാഹചര്യത്തിൽ, പൊതുജനങ്ങളുടെ സുരക്ഷ ഉറപ്പുവരുത്താൻ കൂടുതൽ കർശനമായ നടപടികൾ വേണമെന്ന ആവശ്യം ഇതോടെ ശക്തമായിട്ടുണ്ട്.
