മലപ്പുറം: താനൂര് അപകടത്തിലെ ബോട്ട് ഉടമ നാസര് വിദേശത്തേക്ക് കടക്കാന് ശ്രമിച്ചതായി റിപ്പോര്ട്ട്. നാസറിനെ കോഴിക്കോട് നിന്നാണ് പോലീസ് പിടികൂടിയത്. നാസര് നെടുമ്പാശ്ശേരി വഴി രക്ഷപ്പെടാന് നീക്കം നടത്തിയത് ഇന്നലെ രാത്രിയാണ്. പോലീസ് പിന്തുടരുന്നത് മനസ്സിലാക്കിയതോടെ കോഴിക്കോട്ടേക്ക് മടങ്ങിയെത്തി. ഇവിടെ നിന്നാണ് ഇയാളെ പോലീസ് അറസ്റ്റ് ചെയ്തത്. നരഹത്യ കുറ്റം ചുമത്തി ഇയാള്ക്കെതിരെ പോലീസ് കേസെടുത്തിട്ടുണ്ട്.
അതേസമയം ബോട്ടിന്റെ ഡ്രൈവറും സഹായിയും ഇപ്പോഴും ഒളിവിലാണ്. നാസറിന്റെ വാഹനം കൊച്ചിയില് പിടികൂടുകയും ചെയ്തിരുന്നു. നാസറിന്റെ സഹോദരന് സലാമിനേയും അയല്വാസി മുഹമ്മദ് ഷാഫിയേയും പോലീസ് കസ്റ്റഡിയില് എടുത്തിട്ടുണ്ട്. നാസറിന്റെ മൊബൈല് ഫോണും വാഹനവും ഇവരില് നിന്നും പിടിച്ചെടുത്തിരുന്നു.
