മല്ലപ്പള്ളി : വെള്ളപ്പൊക്ക ദുരിതാശ്വാസ പ്രവർത്തനങ്ങളും ചികിത്സാ സൗകര്യങ്ങളും വിലയിരുത്തി കൂടുതൽ മെച്ചപ്പെടുത്തുവാൻ ആവശ്യമായ നടപടികൾ സ്വീകരിക്കുന്നതിന് മല്ലപ്പള്ളി ബ്ലോക്ക് പഞ്ചായത്ത് ഭരണ സമിതിയും മല്ലപ്പള്ളി താലൂക്ക് ഹോസ്പിറ്റൽ മാനേജ്മെന്റ് കമ്മിറ്റിയും സംയുക്തമായി ചേര്ന്ന യോഗം തീരുമാനിച്ചു. ശുചീകരണ പ്രവർത്തകരുടെ ആരോഗ്യ സുരക്ഷ ഉറപ്പാക്കുവാനും പകർച്ച വ്യാധികൾ വ്യാപിക്കാതിരിക്കുവാൻ ആവശ്യമായ മുൻ കരുതലുകൾ സ്വീകരിക്കുന്നതിനും യോഗം തീരുമാനിച്ചു. ക്യാമ്പുകളിൽ പോകാതെ വീടുകളിൽ ഒറ്റപ്പെട്ടു പോയവർക്ക് പ്രത്യേക ശ്രദ്ധ നല്കും.
വിവിധ വകുപ്പുകളുടെ ഏകോപനത്തോടെ പ്രവർത്തനങ്ങൾ കൂടുതൽ കാര്യക്ഷമ മാക്കുവാനും തീരുമാനിച്ചു. ബ്ലോക്ക് പഞ്ചായത്ത് പ്രസിഡന്റ് ശോശാമ്മ തോമസ് അധ്യക്ഷത വഹിച്ചു. വൈസ് പ്രസിഡന്റ് എബി മേക്കരിങ്ങാട്ട്, മല്ലപ്പള്ളി പഞ്ചായത്ത് പ്രസിഡന്റ് കെ.ജി സാബു, ബ്ലോക്ക് പഞ്ചായത്ത് സ്ഥിരം സമതി അധ്യക്ഷരായ ലൈല അലക്സാണ്ടർ, മുഹമ്മദ് ഇസ്മായിൽ, അംഗങ്ങളായ രഞ്ജിനി അജിത്, ലിബിൻ ജോസഫ്, എ.ഡി ജോൺ, കൃഷ്ണൻകുട്ടി മുള്ളൻകുഴി, സി.പി മാത്യു, ഷിനി കെ.പിള്ള, ധന്യമോൾ ലാലി, പഞ്ചായത്ത് അംഗം മിനികുമാരി, ബ്ലോക്ക് പഞ്ചായത്ത് സെക്രട്ടറി സാം കെ.സലാം, താലൂക്ക് ആശുപത്രി സൂപ്രണ്ട് ഡോ.നന്ദിനി സി.എസ്., ഹോസ്പിറ്റൽ മാനേജ് കമ്മിറ്റി അംഗങ്ങൾ എന്നിവർ പങ്കെടുത്തു.
