കൊച്ചി : അട്ടപ്പാടിയിൽ ആദിവാസി യുവാവ് മധു കൊല്ലപ്പെട്ട കേസിൽ കുടുംബത്തിന് നിയമോപദേശത്തിനായി മമ്മുട്ടി അഭിഭാഷകനെ ചുമതലപ്പെടുത്തി. മുതിർന്ന അഭിഭാഷകൻ വി.നന്ദകുമാരിനെയാണ് മധുവിന്റെ കുടുംബത്തിന് നിയമോപദേശം നല്കാന് മമ്മുട്ടി ചുമതലപ്പെടുത്തിയിരിക്കുന്നത്. മദ്രാസ്, കേരള ഹൈക്കോടതികളിലെ മുതിർന്ന അഭിഭാഷകനാണ് വി. നന്ദകുമാര്. മമ്മുട്ടിയുടെ നിർദ്ദേശ പ്രകാരം മമ്മുട്ടിയുടെ ജീവകാരുണ്യ പ്രവർത്തനങ്ങൾക്ക് നേതൃത്വം നൽകുന്ന റോബർട്ട് കുര്യാക്കോസാണ് അഭിഭാഷകനെ ചുമതലപ്പെടുത്തിയതായി ഫെയ്സ്ബുക്ക് പോസ്റ്റിട്ടിരിക്കുന്നത്. കേസ് നടത്തുക സർക്കാർ തന്നെയായിരിക്കും. മധുവിന്റെ കുടുംബത്തിനും, മധുവിന്റെ കേസിൽ നിയമോപദേശം ആവശ്യമായവർക്കും മമ്മുട്ടി ചുമതലപ്പെടുത്തിയ അഭിഭാഷകന്റെ സഹായം ലഭിക്കും.
