ഇടുക്കി: ഇടുക്കിയില്‍ രണ്ട് മാസമായി ഒന്നിച്ച് താമസിച്ചിരുന്ന പെണ്‍സുഹൃത്തിനെ ഒഴിവാക്കാന്‍ പേഴ്‌സില്‍ മയക്കുമരുന്ന് ഒളിപ്പിച്ച് എക്‌സൈസിന് വിവരം നല്‍കി കുടുക്കാന്‍ ശ്രമിച്ച യുവാവ് പിടിയില്‍. ഇടുക്കി ഉപ്പുതറ കണ്ണംപടി സ്വദേശി ജയന് ആണ് സുഹൃത്ത് മഞ്ജുവിന്റെ പേഴ്‌സില്‍ എംഡിഎംഎ ഒളിപ്പിച്ചത്. ഭര്‍ത്താവും മക്കളുമായി അകന്ന് കഴിഞ്ഞിരുന്ന ഇടുക്കി മേരികുളം സ്വദേശി മഞ്ജു ആറ് മാസം മുമ്പ് ഫേസ്ബുക്കിലൂടെയാണ് ഇുക്കി കണ്ണംപടി സ്വദേശി ജയനെ പരിചയപ്പെട്ടത്. കഴിഞ്ഞ രണ്ട് മാസമായി ഇരുവരും പൊന്‍കുന്നത്ത് ഒരുമിച്ചായിരുന്നു താമസം. ഭാര്യ മരിച്ച് പോയ ജയന് രണ്ട് മക്കളുണ്ട്.
കല്യാണം കഴിച്ച് വീട്ടിലേക്ക് കൊണ്ടുപോകാമെന്ന് പറഞ്ഞ് ഞായറാഴ്ച രാത്രിയിലാണ് മഞ്ജുവുമായി ജയന് കട്ടപ്പനയിലെത്തിയത്. തുടര്‍ന്ന് ലോഡ്ജില്‍ മുറിയെടുത്ത് താമസിച്ചു. രാവിലെ ഇരുവരും ചേര്‍ന്ന് കടയില്‍ പോയി വസ്ത്രം വാങ്ങുകയും ചെയ്തു. പിന്നീട് മഞ്ജുവിന്റെ പേഴ്‌സില്‍ എംഡിഎംഎ ഒളിപ്പിച്ച ശേഷം ജയന് പുറത്തുപോയി. തുടര്‍ന്ന് ലോഡ്ജ് മുറിയില്‍ മയക്കുമരുന്നുമായി യുവതി താമസിക്കുന്നെന്ന വിവരം എക്‌സൈസിനെ വിളിച്ച് അറിയിച്ചു. എക്‌സൈസ് സംഘമെത്തി പരിശോധന നടത്തി. 300 മില്ലി ഗ്രാം എംഡിഎംഎ പിടികൂടി. തനിക്കിതില്‍ പങ്കില്ലെന്ന് യുവതി പറഞ്ഞതോടെ എക്‌സൈസ് കൂടുതല്‍ അന്വേഷണം നടത്തി. തുടര്‍ന്ന് നടത്തിയ അന്വേഷണത്തില്‍ പുരുഷ സുഹൃത്തിന്റെയും വിവരം വിളിച്ച് അറിയിച്ച ആളിന്റെയും നമ്പര്‍ ഒന്നാണെന്ന് മനസ്സിലായി. തുടര്‍ന്ന് യുവതിയെയും ലോഡ്ജ് മാനേജരെയും കൊണ്ട് വിളിപ്പിച്ച് പ്രതിയെ എക്‌സൈസ് നാടകീയമായി പിടികൂടുകയായിരുന്നു.
