അഞ്ചല് : നൈറ്റ് പട്രോളിംഗ് സംഘത്തെ ആക്രമിച്ച് പരിക്കേല്പിച്ച സംഘത്തിലെ ഒരാളെക്കൂടി ഏരൂര് പോലീസ് അറസ്റ്റ് ചെയ്തു. ഏരൂര് കരിമ്പിന്കോണം തടത്തിവിള വീട്ടില് മുണ്ടന് എന്ന് വിളിക്കപ്പെടുന്ന വിപിന്(41) ആണ് അറസ്റ്റിലായത്. ഏരൂര് പോലീസ് നടത്തിവന്ന തെരച്ചിലില് കഴിഞ്ഞ ദിവസം ആര്ച്ചല് ഭാഗത്തു നിന്നുമാണ് ഇയാളെ കസ്റ്റഡിയിലെടുത്തത്. ഇതോടെ ഈ കേസില് ആകെ ഏഴ് പേരാണ് അറസ്റ്റിലായിട്ടുള്ളത്.
കേസിലെ രണ്ടാം പ്രതിയാണ് വിപിന്. ഏതാനും ദിവസം മുമ്പ് നൈറ്റ് പട്രോളിംഗിനിടെ ആലഞ്ചേരിയില് വെച്ചാണ് വിപിന് ഉള്പ്പെടെയുള്ള മദ്യപസംഘം നൈറ്റ് പട്രോളിംഗ് നടത്തിവന്ന പോലീസ് സംഘത്തെ ആക്രമിച്ച് പരിക്കേല്പിച്ചത്. രണ്ട് പേരെ സംഭവസ്ഥലത്തു നിന്നുമാണ് പോലീസ് അറസ്റ്റ് ചെയ്തത്. രണ്ട് പേര് ഓടി രക്ഷപ്പെടുകയായിരുന്നു.
ഇവരെ ഒളിവില് കഴിയുവാന് സഹായിച്ച നാലു പേരെ ഏരൂര് പോലീസ് കഴിഞ്ഞ ദിവസം അറസ്റ്റ് ചെയ്തിരുന്നു. 2006ല് പോലീസിനെ ആക്രമിച്ച കേസിലും പ്രതിയാണ് വിപിന്. കോടതിയില് ഹാജരാക്കിയ പ്രതിയെ റിമാന്റ് ചെയ്തു. ഒളിവില് കഴിയുന്ന മറ്റൊരു പ്രതിയായ നൗഫലിന് വേണ്ടിയുള്ള അന്വേഷണം നടക്കുന്നതായി പോലീസ് പറഞ്ഞു.
