ന്യൂഡല്ഹി : മുല്ലപ്പെരിയാര് അണക്കെട്ടുമായി ബന്ധപ്പെട്ട എല്ലാ വിഷയങ്ങളും ദേശീയ ഡാം സുരക്ഷാ അതോറിറ്റിക്ക് വിടണമെന്ന് കേന്ദ്രം. അണക്കെട്ടിന്റെ സുരക്ഷ ഉള്പ്പടെയുള്ള കാര്യങ്ങള് അതോറിറ്റി പരിശോധിക്കുമെന്ന് കേന്ദ്ര സര്ക്കാര് സുപ്രീം കോടതിയെ അറിയിച്ചു. എന്നാല് കേന്ദ്രത്തിന്റെ നിലപാടിനെ സുപ്രീം കോടതിയില് തമിഴ്നാട് പിന്തുണച്ചു. മുല്ലപ്പെരിയാര് വിഷയത്തില് കേന്ദ്രം ശക്തമായ നിലപാട് എടുക്കണമെന്ന് കേരളം കോടതിയില് ആവശ്യപ്പെട്ടു.
മുല്ലപ്പെരിയാര് അണക്കെട്ടുമായി ബന്ധപ്പെട്ട ഹര്ജികള് പരിഗണിക്കവെയാണ് കേന്ദ്ര ജലകമ്മീഷനും മേല്നോട്ട സമിതിക്കും വേണ്ടി ഹാജരായ അഡീഷണല് സോളിസിറ്റര് ജനറല് ഐശ്വര്യ ഭാട്ടി ഇക്കാര്യം സുപ്രീം കോടതിയില് ഉന്നയിച്ചത്. ഡാം സുരക്ഷാ നിയമത്തിന്റെ അടിസ്ഥാനത്തില് രാജ്യത്തെ അണക്കെട്ടുകളുടെ സുരക്ഷ ഉള്പ്പടെ വിലയിരുത്തുന്നതിന് ദേശീയ ഡാം സുരക്ഷാ ആതോറിറ്റി വിജ്ഞാപനം ചെയ്തതായും അതിനാല് മുല്ലപ്പെരിയാറുമായി ബന്ധപ്പെട്ട വിഷയങ്ങള് അതോറിറ്റിക്ക് വിടണമെന്നും ഐശ്വര്യ ഭാട്ടി കോടതിയില് ആവശ്യപ്പെട്ടു.
