കൊല്ലം: ബന്ധുവിന്റെ കാര് തട്ടിയെടുത്ത ശേഷം വ്യാജ രേഖകള് ഉണ്ടാക്കി കാര് പണയം വെച്ച സംഘത്തില്പെട്ട ഒരാളെ ഇരവിപുരം പോലീസ് അറസ്റ്റ് ചെയ്തു. ബൈക്കിലെത്തി സ്ത്രീയുടെ മാല പൊട്ടിച്ചു കടന്ന കേസില് നേരത്തേ പിടിയിലായ ആളാണ് ഈ കേസിലും പിടിയിലായിട്ടുള്ളത്.
ഇരവിപുരം കയ്യാലക്കല് അറഫാ നഗര് 81 ഹമീദാ മന്സിലില് ഷുഹൈബ് (25) ആണ് പിടിയിലായത്. ഇയാള് ഇപ്പോള് തൃക്കോവില്വട്ടം മൈലാപ്പൂര് പേരയം ഗവ.എല്.പി.സ്കൂളിന് വടക്ക് കനാല് പുരയിടത്തില് നജീം മന്സിലില് വാടകക്ക് താമസിക്കുകയായിരുന്നു. ഇയാള്ക്കൊപ്പമുണ്ടായിരുന്നയാള്ക്കായി പോലീസ് തിരച്ചില് ആരംഭിച്ചിട്ടുണ്ട്.
അയത്തില് പണിക്കന്റയ്യത്ത് നഗറില് പണ്ടകശാല തൊടിയില് അന്സാരിയുടെ കാറാണ് ഇവര് തട്ടിയെടുത്തത്. അന്സാരിയുടെ ബന്ധുവാണ് ഷുഹൈബ്. ഇരവിപുരം പോലീസില് അന്സാരി നല്കിയ പരാതിയുടെ അടിസ്ഥാനത്തില് നടത്തിയ അന്വേഷണത്തിലാണ് കാര് കണ്ടെത്തിയതും പ്രതിയെ പിടികൂടാന് കഴിഞ്ഞതും. നേരത്തെ ബൈക്കിലെത്തി മാല പിടിച്ചുപറിച്ചതിന് ഷുഹൈബ് അറസ്റ്റിലായിരുന്നു. വിവിധ സറ്റേഷനുകളിലായി പ്രതിക്കെതിരെ വേറെയും കേസുകളുണ്ട്. ഇരവിപുരം എസ്.എച്ച്.ഓ.വിനോദ്, എസ്.ഐമാരായ അനീഷ്, ബിനോദ് കുമാര്, ദീപു, ജി.എസ്.ഐ.ആന്റണി, എ.എസ്.ഐ.മാരായ ഷിബു ജെ.പീറ്റര്, ജയപ്രകാശ് എന്നിവരടങ്ങിയ സംഘമാണ് പ്രതിയെ പിടികൂടിയത്.