കൊച്ചി : പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ച കേസില് അച്ഛന് ഇരട്ട ജീവപര്യന്തം. ജീവപര്യന്തം തടവിന് പുറമെ രണ്ട് ലക്ഷം രൂപ പിഴയ്ക്കും കോടതി ശിക്ഷിച്ചു. അഡീഷണല് സെഷന്സ് (പോക്സോ) കോടതി ജഡ്ജി കെ സോമനാണ് ശിക്ഷ വിധിച്ചത്. 2017 ആഗസ്റ്റിലാണ് സംഭവം. വീട്ടില് ആരുമില്ലാത്ത സമയത്ത് പെണ്കുട്ടിയെ നിര്ബന്ധിച്ച് മദ്യം നല്കി നിരന്തരം ബലാത്സംഗത്തിന് ഇരയാക്കിയെന്നാണ് പ്രോസിക്യൂഷന് കേസ്.
പെണ്കുട്ടിയെ പ്രണയം നടിച്ച് ആലപ്പുഴക്കാരനായ രതീഷ് (28) എന്ന യുവാവ് തട്ടിക്കൊണ്ടു കൊണ്ടുപോയതിനെ തുടര്ന്നാണ് സംഭവം പുറം ലോകമറിയുന്നത്. തട്ടിക്കൊണ്ടു പോയ ഇയാളും പെണ്കുട്ടിയെ പീഡിപ്പിച്ചിരുന്നു. അച്ഛനെയും യുവാവിനെയും ഒന്നും രണ്ടും പ്രതികളാക്കിയാണ് പോലീസ് കുറ്റപത്രം നല്കിയത്. പെണ്കുട്ടിയെ ബലാത്സംഗം ചെയ്ത കാമുകനെയും കുറ്റക്കാരനാണെന്ന് കോടതി കണ്ടെത്തി. ഇയാള്ക്കെതിരെയുള്ള ശിക്ഷ പിന്നീട് പറയും.
