ദില്ലി: മണിപ്പൂര് സന്ദര്ശിച്ച എഡിറ്റേഴ്സ് ഗില്ഡ് സംഘത്തിലെ മാധ്യമപ്രവര്ത്തകര്ക്കെതിരായ തുടര്നടപടികള് സുപ്രീംകോടതി സ്റ്റേ ചെയ്തു. മാധ്യമപ്രവര്ത്തകരെ അറസ്റ്റ് ചെയ്യാന് പാടില്ലെന്നും മണിപ്പൂര് സര്ക്കാര് എതിര് സത്യവാങ്മൂലം സമര്പ്പിക്കണമെന്നും സുപ്രീംകോടതി ഉത്തരവിട്ടു. സംസ്ഥാന സര്ക്കാര് രജിസ്റ്റര് ചെയ്ത കേസിനെതിരെ എഡിറ്റേഴ്സ് ഗില്ഡ് സമര്പ്പിച്ച ഹര്ജിയിലാണ് കോടതി ഉത്തരവ്. ചീഫ് ജസ്റ്റിസ് ഡി വൈ ചന്ദ്രചൂഡ്, ജസ്റ്റിസുമാരായ ജെ ബി പര്ദിവാല, മനോജ് മിശ്ര എന്നിവരടങ്ങിയ ബെഞ്ചാണ് ഹര്ജി പരിഗണിച്ചത്. കേസ് അടുത്ത വെള്ളിയാഴ്ച വീണ്ടും പരിഗണിക്കും.
റിപ്പോര്ട്ട് തെറ്റിയതിന്റെ പേരില് മാധ്യമപ്രവര്ത്തകര്ക്കെതിരെ മതസ്പര്ധയുടെ പേരില് കേസെടുക്കുന്നത് എങ്ങനെയെന്ന് മണിപ്പൂര് സര്ക്കാരിനോട് സുപ്രീംകോടതി ചോദിച്ചു. കഴിഞ്ഞതവണ കേസ് പരിഗണിക്കവെ മാധ്യമപ്രവര്ത്തകരുടെ അറസ്റ്റ് സുപ്രീംകോടതി തടഞ്ഞിരുന്നു. മണിപ്പൂര് സര്ക്കാര് അറസ്റ്റ് ചെയ്യാന് സാധ്യതയുണ്ടെന്നും ഹര്ജിയില് അടിയന്തരമായി വാദം കേള്ക്കണമെന്നും ആവശ്യപ്പെട്ടാണ് എഡിറ്റേഴ്സ് ഗില്ഡ് സുപ്രീംകോടതിയെ സമീപിച്ചത്.