ഡല്ഹി: സംഘര്ഷം തുടരുന്ന മണിപ്പൂരില് മരണസംഖ്യ ഉയരുന്നു. ഇതുവരെ 54 പേര്ക്ക് ജീവന് നഷ്ടപ്പെട്ടതായി വൃത്തങ്ങളെ ഉദ്ധരിച്ച് വാര്ത്താ ഏജന്സി പിടിഐ റിപ്പോര്ട്ട് ചെയ്തു. മരിച്ച 54 പേരില് 16 മൃതദേഹങ്ങള് ചുരാചന്ദ്പൂര് ജില്ലാ ആശുപത്രിയിലെ മോര്ച്ചറിയിലും 15 മൃതദേഹങ്ങള് ഇംഫാല് ഈസ്റ്റിലെ ജവഹര്ലാല് നെഹ്റു ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസിലും സൂക്ഷിച്ചിരിക്കുകയാണ്.
ഇംഫാല് വെസ്റ്റിലെ ലാംഫെലിലുള്ള റീജിയണല് ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസില് 23 പേരുടെ മരണം സ്ഥിരീകരിച്ചു. സ്ഥിതിഗതികള് നിയന്ത്രിക്കാന് സൈന്യത്തിന്റെയും അസം റൈഫിള്സിന്റെയും പതിനായിരത്തോളം സൈനികരെ സംസ്ഥാനത്ത് വിന്യസിച്ചിട്ടുണ്ട്. നൂറോളം പേര്ക്ക് പരിക്കേറ്റിട്ടുണ്ട്. ഇത് സ്ഥിരീകരിക്കാന് പോലീസ് തയ്യാറായിട്ടില്ല. മണിപ്പൂരില് ആദിവാസി ഇതര വിഭാഗമായ മെയ്തേയ് സമുദായത്തെ പട്ടികവര്ഗ വിഭാഗത്തില് ഉള്പ്പെടുത്തുന്നത് സംബന്ധിച്ച കോടതി ഉത്തരവിനെതിരെയാണ് പ്രതിഷേധം.
