തിരുവനന്തപുരം : മാവോയിസ്റ്റ് നേതാവ് രൂപേഷിനെതിരായി സംസ്ഥാനത്തെ വിവിധ സ്റ്റേഷനുകളില് രജിസ്റ്റര് ചെയ്തിരുന്ന മൂന്ന് കേസുകളില് യുഎപിഎ വകുപ്പുകള് പുന:സ്ഥാപിക്കണമെന്ന് സംസ്ഥാന സര്ക്കാര്. ഇക്കാര്യം ആവശ്യപ്പെട്ട് സംസ്ഥാന സര്ക്കാര് സുപ്രീംകോടതിയെ സമീപിച്ചു. ഹൈക്കോടതി ഡിവിഷന് ബെഞ്ച് വിധി അടിയന്തിരമായി സ്റ്റേ ചെയ്യണമെന്നും കേസുകളുടെ മെറിറ്റിന്റെ അടിസ്ഥാനത്തിലല്ല ഹൈക്കോടതി നടപടിയെന്നും സര്ക്കാര് ഹര്ജിയില് ആരോപിക്കുന്നു.
നിരോധിത സംഘടനയുടെ ലഘുലേഖ വിതരണം ചെയ്തെന്നാരോപിച്ച് 2013 ല് കുറ്റ്യാടി പോലീസ് സ്റ്റേഷനിലെ രണ്ടു കേസിലും 2014 ല് വളയം പോലീസ് സ്റ്റേഷനിലെ ഒരു കേസിലുമാണ് രൂപേഷിനെതിരെ യുഎപിഎ നിയമം ചുമത്തിയിരുന്നത്. കേസില് യുഎപിഎ ചുമത്താനുള്ള തെളിവുകള് വ്യക്തമാക്കി അന്വേഷണ സംഘം നല്കുന്ന റിപ്പോര്ട്ടില് അതോറിറ്റി ഒരാഴ്ചക്കകം തീരുമാനം എടുക്കണമെന്നാണ് വ്യവസ്ഥ. എന്നാല് രൂപേഷിന്റെ കേസില് ഇത് ആറുമാസം വരെ എടുത്തുവെന്ന് ചൂണ്ടിക്കാട്ടി ഹൈക്കോടതി രൂപേഷിന് അനുകൂലമായി വിധി പുറപ്പെടുവിക്കുകയായിരുന്നു.
