എരുമേലി: അമ്മയുടെ മരണത്തില് ദുരൂഹതയുണ്ടെന്നും അന്വേഷണം വേണമെന്നും ആവശ്യപ്പെട്ട് മകള് നല്കിയ പരാതിയെ തുടര്ന്ന് സംസ്ക്കരിച്ച മൃതദേഹം പുറത്തെടുത്ത് പരിശോധന നടത്താന് നടപടി. മുട്ടപ്പള്ളി കുളത്തുങ്കല് വീട്ടില് മാര്ത്തമോശയുടെ (പൊടിയമ്മ-83) മൃതദേഹമാണ് എട്ട് മാസങ്ങള്ക്കുശേഷം തിങ്കളാഴ്ച പുറത്തെടുത്ത് പോസ്റ്റ്മോര്ട്ടം നടത്താന് തീരുമാനിച്ചിരിക്കുന്നത്. കാസര്കോട് താമസിക്കുന്ന മകള് ബേബിക്കുട്ടിയാണ് ജില്ല പോലീസ് മേധാവിക്ക് പരാതി നല്കിയത്.
2021 ഒക്ടോബറില് മാര്ത്തമോശക്ക് തീ പൊള്ളല് ഏറ്റിരുന്നു. പിന്നീട് കുറച്ച് ദിവസങ്ങള്ക്കുശേഷം മരിക്കുകയുമായിരുന്നുവെന്നും ഇതില് ദുരൂഹതയുള്ളതായി സംശയിക്കുന്നുവെന്നും മകള് പറഞ്ഞു. മുട്ടപ്പള്ളി സി.എം.എസ് പള്ളി സെമിത്തേരിയില് സംസ്ക്കരിച്ച മൃതദേഹം കാഞ്ഞിരപ്പള്ളി തഹസില്ദാറിന്റെ നേതൃത്വത്തില് പുറത്തെടുത്താകും പരിശോധന.