കൊല്ലം: കൊല്ലം ചവറയിലെ തുണിക്കടയിൽ മോഷണം നടത്തിയ പ്രതികൾക്കായി അന്വേഷണം ഊർജിതം. ഓണത്തിനായി എടുത്ത പുതിയ സ്റ്റോക്ക് കടത്തിക്കൊണ്ടുപോയ രണ്ട് അംഗ സംഘത്തിനായാണ് തെരച്ചിൽ നടക്കുന്നത്. ക്രിസ്മസ് പാപ്പയുടെ മുഖംമൂടി ധരിച്ച് ആണ് മോഷ്ടാക്കൾ കടയിൽ എത്തിയതും മോഷണം നടത്തിയതും. കഴിഞ്ഞ ദിവസം പുലർച്ചെ 2 മണിയോടെയായിരുന്നു സംഭവം. ചവറ ജംഗ്ഷനിലുള്ള തുണിക്കടയിലാണ് മുഖംമൂടി ധരിച്ചെത്തിയ മോഷ്ടാക്കാൾ മോഷണം നടത്തിയത്.
കടയുടെ ചില്ല് വാതിൽ ചവിട്ടിപ്പൊളിച്ച് അകത്തുകടന്ന യുവാക്കൾ പുതിയ സ്റ്റോക്കുമായി കടന്നുകളയുകയായിരുന്നു. ബൈക്കിലാണ് സംഘം സ്ഥലത്തെത്തിയതും, മോഷണത്തിന് ശേഷം മടങ്ങിയതും. സിസിടിവി ദൃശ്യങ്ങൾ കേന്ദ്രീകരിച്ചു നടത്തിയ അന്വേഷണത്തിൽ പൊലീസ് പ്രതികളെ തിരിച്ചറിഞ്ഞിട്ടുണ്ട്. ഇവർക്കായുള്ള അന്വേഷണം നടക്കുകയാണെന്ന് ചവറ പോലീസ് അറിയിച്ചു.
