കാസർഗോഡ് : പൂച്ചക്കാട് മസ്ജിദിന് സമീപം താമസിക്കുന്ന പ്രവാസിയായ അബ്ദുൽ മജീദിന്റെ വീട്ടിൽ വൻ കവർച്ച. 50 പവൻ സ്വർണാഭരണങ്ങളും വജ്രാഭരണങ്ങളും പണവുമാണ് വീട്ടിൽ നിന്നും കവർന്നത്. ശനിയാഴ്ച രാത്രിയിലാണ് മോഷണം നടന്നതെന്നാണ് നിഗമനം. അബ്ദുൽ മജീദിന്റെ ഭാര്യയും മക്കളും പൂച്ചക്കാട്ടെ തന്നെ ഒരു ബന്ധുവീട്ടിൽ പോയിരുന്ന സമയത്തായിരുന്നു സംഭവം. ഞായറാഴ്ച പുലർച്ചെ മജീദിന്റെ 12 വയസ്സുള്ള മകൻ വീട്ടിലെത്തിയപ്പോഴാണ് കവർച്ച നടന്ന വിവരം പുറത്തറിയുന്നത്. സമീപത്തുള്ള വീട്ടിൽ നിന്നും എടുത്ത പിക്കാസ് ഉപയോഗിച്ച് വീടിന്റെ മുൻവാതിൽ തകർത്താണ് മോഷ്ടാക്കൾ അകത്ത് പ്രവേശിച്ചത്.
അടച്ചിട്ടിരുന്ന കിടപ്പുമുറിയുടെ വാതിലിന്റെ പൂട്ട് തകർത്ത് അകത്തുകയറിയ സംഘം അലമാരയിൽ സൂക്ഷിച്ചിരുന്ന ആഭരണങ്ങൾ കവരുകയായിരുന്നു. അലമാരയിലെ സാധനങ്ങൾ വാരിവലിച്ചിട്ട നിലയിലായിരുന്നു. സംഭവത്തിൽ ബേക്കൽ പോലീസ് അന്വേഷണം ആരംഭിച്ചിട്ടുണ്ട്. ഫോറൻസിക് സംഘം സ്ഥലത്തെത്തി പരിശോധന നടത്തി. വീട്ടിൽ സിസിടിവി ക്യാമറകൾ ഇല്ലാത്തതിനാൽ പരിസര പ്രദേശങ്ങളിലെ സിസിടിവി ദൃശ്യങ്ങൾ കേന്ദ്രീകരിച്ചാണ് പോലീസ് ഇപ്പോൾ അന്വേഷണം നടത്തുന്നത്.
