കൊല്ലം: കൊല്ലത്ത് മുഖ്യമന്ത്രിയുടെ പരിപാടിയില് ആളെ കൂട്ടാന് മേയറുടെ കത്ത്. അങ്കണവാടി ജീവനക്കാരെ പരിപാടിയില് പങ്കെടുപ്പിക്കണമെന്നാണ് നിര്ദേശം. ശിശുവികസന ഓഫീസര്മാര്ക്കാണ് മേയര് പ്രസന്ന ഏര്ണസ്റ്റ് കത്ത് നല്കിയത്. ശ്രീനാരായണ ഗുരു സാംസ്കാരിക സമുച്ചയം ഉദ്ഘാടനത്തിന് ജീവനക്കാരെ പങ്കെടുപ്പിക്കാനാണ് നിര്ദേശം നല്കിയത്. കത്ത് പുറത്തായതോടെ വിവാദം ഉയര്ന്നിരിക്കുകയാണ്.
കിഫ്ബിയുടെ സഹായത്തോടെ സാംസ്കാരിക വകുപ്പാണ് മൂന്നര ഏക്കര് ഭൂമിയില് 56.91 കോടി രൂപ ചെലവഴിച്ച് അത്യാധുനിക സംവിധാനങ്ങള് ഉള്പ്പെടുത്തി ശ്രീനാരായണഗുരു സാംസ്കാരിക സമുച്ചയം നിര്മ്മിച്ചിരിക്കുന്നത്. കേരളത്തിലെ എല്ലാ ജില്ലകളിലും നവോഥാന നായകരുടെ പേരില് സാംസ്കാരിക സമുച്ചയങ്ങള് സ്ഥാപിക്കുന്നതിന്റെ ഭാഗമായി കൊല്ലം ആശ്രാമം മൈതാനത്തിന് സമീപമാണ് സമുച്ചയം നിര്മ്മിച്ചിരിക്കുന്നത്.
