റാന്നി : മുഴുവൻ സമയ അധ്യയനം ആരംഭിക്കുന്ന ദിവസം കുട്ടികൾക്ക് കൗതുകം ഉണ്ടാക്കാൻ പഠനപ്രവർത്തനം ദൃശ്യവൽക്കരിച്ച് ചേത്തക്കൽ എം സി യു പി സ്കൂൾ. ജലക്ഷാമം അനുഭവപ്പെടുന്ന പ്രദേശത്ത് കുളം എന്ന ആവാസ വ്യവസ്ഥയാണ് അധ്യാപകർ ക്ലാസിൽ ഒരുക്കിയത്. ഓൺലൈൻ പഠനകാലത്ത് കേട്ട് പരിചയം ഉള്ള തങ്ങൾക്ക് പ്രിയപ്പെട്ട പല കഥാപാത്രങ്ങളെയും ജീവനോടെ കാണാൻ കഴിഞ്ഞത് കുട്ടികൾക്ക് നവ്യാനുഭവമായി.
പ്രകൃതി സൗഹൃദ മനോഭാവം കുട്ടികളിൽ ഉണ്ടാക്കാൻ വിവിധ ആവാസവ്യവസ്ഥകളെയും ജൈവവൈവിധ്യങ്ങളേയും കുട്ടികൾക്ക് പരിചയപ്പെടാനുള്ള തുടർ പ്രവർത്തനങ്ങളും ആസൂത്രണം ചെയ്തു. അക്കാദമിക താൽപര്യത്തോടെ കൂടി നടത്തിയ പരിപാടി പി ടി എ പ്രസിഡണ്ട് സിബി മാമ്മൻ ജോസഫ് പരിപാടി ഉദ്ഘാടനം ചെയ്തു. പ്രഥമധ്യാപിക ജൂബി മാത്യു അധ്യാപകരായ മോൻസി മാത്യു, ബിനു കെ സാം, ബിന്ദുമോൾ എബ്രഹാം, സി ആർ സി കോഡിനേറ്റർ സൈജു സക്കറിയ എന്നിവർ നേതൃത്വം നൽകി.
