കോട്ടയം: കോട്ടയം മെഡിക്കല് കോളേജില് രോഗികള്ക്കൊപ്പമെത്തുന്ന യുവാക്കള് അത്യാഹിത വിഭാഗത്തിലെ ജീവനക്കാരികളുടെ ഫോട്ടോയെടുക്കുന്നതായി പരാതി. മെബൈല് ഫോണില് വീഡിയോയും ഫോട്ടോയും എടുക്കുന്നത് പതിവാക്കിയതോടെ ഇത് ജീവനക്കാരുടെ ശ്രദ്ധയില്പ്പെടുകയായിരുന്നു. വനിതാ ജീവനക്കാരുടെ ചിത്രം അവരറിയാതെ പകര്ത്തി വരികയായിരുന്നു. ഇക്കാര്യം ജീവനക്കാരികളുടെ ശ്രദ്ധയില്പ്പെട്ടാല് അവര് പരാതിപ്പെടുവാന് തയ്യാറാകാതെ ഫോണ് പരിശോധിച്ച് ഫോട്ടോയും വീഡിയോയും ഡിലീറ്റ് ചെയ്തിട്ട് പറഞ്ഞ് വിടുകയായിരുന്നു പതിവ്. കഴിഞ്ഞ ദിവസം ഒരു യുവാവ് വീഡിയോ പകര്ത്തുന്നത് ശ്രദ്ധയില്പ്പെട്ടതിനെത്തുടര്ന്ന് സെക്യൂരിറ്റി ജീവനക്കാരി പിടികൂടിയിരുന്നു.
സംഭവത്തെ തുടര്ന്ന് ഇയാളെ അത്യാഹിത വിഭാഗത്തിനുള്ളില് നിന്ന് പുറത്താക്കിയിരുന്നു. പുറത്താക്കിയതിന് ശേഷവും ഇയാള് ജീവനക്കാരുടെ ചിത്രം പകര്ത്താന് ശ്രമിച്ചു. സംഭവം അറിഞ്ഞ് പോലീസ് എയ്ഡ് പോസ്റ്റ് ഡ്യൂട്ടിയിലിണ്ടായിരുന്ന സിപിഒ ചോദിച്ചെങ്കിലും ഇയാള് അസഭ്യം പറയുകയായിരുന്നു. ഇതിന്റെ പേരില് ഇയാളെ അറ്സറ്റ് ചെയ്യാന് നീക്കമുണ്ടായെങ്കിലും രോഗിയുടെ നില വഷളായതിനെത്തുടര്ന്ന് വിട്ടയച്ചു. അത്യാഹിത വിഭാഗത്തിലും മെഡിക്കല് കോളേജ് പരിസരങ്ങളിലും മാധ്യമ പ്രവര്ത്തകര്ക്ക് ഒഴികെയുള്ളവര്ക്ക് ചിത്രം പകര്ത്തുന്നതില് നിയന്ത്രണം നില നില്ക്കെയാണ് യുവാക്കളുടെ ഫോട്ടായെടുക്കല് പതിവാകുന്നത്.