മുംബൈ : മഹാരാഷ്ട്രയിലെ അമരാവതിയിലെ മെഡിക്കല് ഷോപ്പ് ഉടമയുടെ കൊലപാതകത്തില് എന്.ഐ.എ എഫ്.ഐ.ആര് രജിസ്റ്റര് ചെയ്ത് അന്വേഷണം ആരംഭിച്ചു. യു.പി.എ, കലാപശ്രമം, കൊലപാതകം തുടങ്ങിയ വകുപ്പുകള് ചുമത്തിയാണ് എന്.ഐ.എ അന്വേഷണം ആരംഭിച്ചിരിക്കുന്നത്. കൊലപാതകത്തില് ദേശീയതലത്തില് ഗൂഢാലോചന നടന്നിട്ടുണ്ടോ വിദേശ സംഘടനകളുടെ സഹായം ലഭിച്ചിട്ടുണ്ടോയെന്നും എന്.ഐ.എ അന്വേഷിക്കും.
മഹാരാഷ്ട്രയിലെ അമരാവതിയിലെ ഉമേഷ് കോലെയുടെ മരണം സംബന്ധിച്ചാണ് എന്.ഐ.എ അന്വേഷണം ആരംഭിച്ചിരിക്കുന്നത്. മകന്റെ പരാതിയിലാണ് അന്വേഷണം പുരോഗമിക്കുന്നത്. ജൂണ് 21ന് രണ്ട് പേര് ഉമേഷിനെ കഴുത്തറുത്ത് കൊല്ലുകയായിരുന്നു. രാജസ്ഥാനിലെ ഉദയ്പൂരിലെ കനയ്യ ലാലിനെ കൊലപ്പെടുത്തുന്നതിന് ഒരാഴ്ച മുമ്പായിരുന്നു സംഭവം.
തുടര്ന്ന് പ്രാദേശിക ബി.ജെ.പി നേതൃത്വം ഉമേഷിന്റെ കൊലപാതകത്തില് പരാതിയുമായി പോലീസിനെ സമീപിക്കുകയായിരുന്നു. കേസില് പോലീസ് അന്വേഷണം നടത്തുകയും ആറ് പ്രതികളെ അറസ്റ്റ് ചെയ്യുകയും ചെയ്തു. നൂപുര് ശര്മ്മയെ പിന്തുണച്ചുള്ള പോസ്റ്റുകള് ചില വാട്സാപ്പ് ഗ്രൂപ്പുകളില് ഇയാള് പങ്കുവെച്ചുവെന്നാണ് പോലീസ് പറയുന്നത്. ഇത് കൊലപാതകത്തിലേക്ക് നയിച്ചുവെന്നാണ് സംശയം.
