തിരുവനന്തപുരം : വഞ്ചിയൂര് കോടതിവളപ്പില് മാധ്യമ പ്രവര്ത്തകരെ അഭിഭാഷകര് കയ്യേറ്റം ചെയ്തു. മാധ്യമപ്രവര്ത്തകന് കെ.എം ബഷീറിനെ വാഹനമിടിച്ച് കൊലപ്പെടുത്തിയ കേസിലെ പ്രതികളായ ശ്രീറാം വെങ്കിട്ടരാമന്റെയും വഫ ഫിറോസിന്റെയും ചിത്രം പകര്ത്തുന്നതിനിടെയാണ് സംഭവം. കയ്യേറ്റത്തില് സിറാജ് ഫോട്ടോഗ്രാഫര് ശിവജിക്ക് പരിക്കേറ്റു. അദ്ദേഹത്തിന്റെ മൊബൈല് ഫോണും ഐ.ഡി കാര്ഡും പിടിച്ചെടുക്കുകയും ചെയ്തു.
കെ.എം ബഷീര് കൊല്ലപ്പെട്ടിട്ട് രണ്ട് വര്ഷം പിന്നിടുമ്പോഴാണ് കേസില് വിചാരണ നടപടികള് ആരംഭിക്കുന്നത്. ഇന്ന് പ്രതികളായ ശ്രീറാം വെങ്കിട്ടരാമനും വഫ ഫിറോസും തിരുവനന്തപുരം ജില്ലാ സെഷന്സ് കോടതിയില് നേരിട്ട് ഹാജരായിരുന്നു. കേസ് അടുത്ത മാസം 29 ന് വീണ്ടും പരിഗണിക്കും.
കേസില് തെളിവായി പ്രത്യേക സംഘം നല്കിയ സിസി ടിവിയുടെ ദൃശ്യങ്ങള് ശ്രീറാം വെങ്കിട്ട രാമന് ആവശ്യപ്പെട്ട പ്രകാരം മജിസ്ട്രേറ്റ് കോടതി നല്കിയിരുന്നു. ഇതിനുശേഷമാണ് കേസ് സെഷന്സ് കോടതിയിലേക്ക് മാറ്റിയത്. 2019 ഓഗസ്റ്റ് മൂന്നിന് പുലര്ച്ചെ ശ്രീറാം വെങ്കിട്ടരാമന് മദ്യപിച്ച് അമതിവേഗയില് ഓടിച്ച കാറിടിച്ചാണ് കെ.എം ബഷീറിന്റെ മരണം. വാഹന ഉടമയായ വഫ ഫിറോസും ഒപ്പമുണ്ടായിരുന്നു.
