അമ്പലപ്പുഴ : വനിതാ ഡോക്ടറെ കയ്യേറ്റം ചെയ്ത കേസില് മന്ത്രി സജി ചെറിയാന്റെ ഗണ്മാനെതിരെ കേസെടുത്തു. സജി ചെറിയാന്റെ ഗണ്മാനായ അനീഷ് മോനെതിരെ (40)യാണ് അമ്പലപ്പുഴ പോലീസ് കേസെടുത്തത്. മെഡിക്കല് കോളജ് ആശുപത്രിയിലെ വനിതാ ഹൗസ് സര്ജന് ജുമിന ഗഫൂറിനെ ദേഹോപദ്രവം ഏല്പിച്ചതിനും ജോലി തടസ്സപ്പെടുത്തിയതിനുമാണ് കേസ്. മെഡിക്കല് കോളജ് ആശുപത്രിയില് ചികിത്സയിലിരിക്കെ അനീഷ് മോന്റെ പിതാവ് ചെങ്ങന്നൂര് കോടുകുളഞ്ഞി വലിയപറമ്പില് ഉല്ലാസ് ഭവനില് കുഞ്ഞുകുഞ്ഞ് (പീയൂസ് 73) ശനിയാഴ്ച രാത്രി മരിച്ചു. ശ്വാസംമുട്ടലിനെ തുടര്ന്ന് ചികിത്സയിലിരുന്ന കുഞ്ഞുകുഞ്ഞിന്റെ ആരോഗ്യനില വഷളായതിനെത്തുടര്ന്ന് രാത്രിയില് വാര്ഡില് നിന്ന് പുനരുജ്ജീവന മുറിയിലേക്കു മാറ്റുമ്പോഴാണ് ബഹളവും കയ്യേറ്റവും നടന്നതെന്നു ഹൗസ് സര്ജന്റെ മൊഴിയില് പറയുന്നു. രോഗിയെ റസിഡന്റ് ഡോക്ടറും ഹൗസ് സര്ജന്മാരും ചേര്ന്നുമുറിയില് പ്രവേശിപ്പിച്ചു. പിന്നാലെ, അനീഷ് മോന് മുറി തള്ളിത്തുറന്ന് അകത്തുകയറി വനിത ഹൗസ് സര്ജനെ പിടിച്ചുതള്ളി താഴെയിട്ടെന്നാണു പരാതി. കേസില് ഡപ്യൂട്ടി സൂപ്രണ്ട് ഹൗസ് സര്ജന്മാരുടെ മൊഴിയെടുത്തു. ഇന്നു സര്ക്കാരിനു റിപ്പോര്ട്ട് നല്കും.
