കൊച്ചി: ഉപഭോക്തൃ സേവനം കൂടുതൽ വേഗത്തിലും കാര്യക്ഷമമായും നൽകാൻ സഹായിക്കുന്ന പുതിയ എഐ സംവിധാനവുമായി മെറ്റ. ബിസിനസ് സ്ഥാപനങ്ങൾക്കായി ‘മെറ്റാ ബിസിനസ് ഏജന്റ്’ എന്ന ആർട്ടിഫിഷ്യൽ ഇന്റലിജൻസ് അധിഷ്ഠിത സേവനമാണ് വാട്ട്സ്ആപ്പിലൂടെ കമ്പനി പ്രഖ്യാപിച്ചത്. ഉപഭോക്താക്കളുമായി 24 മണിക്കൂറും ആശയവിനിമയം നടത്താനും വ്യക്തിഗത സേവനങ്ങൾ നൽകാനും സംരംഭങ്ങളെ പ്രാപ്തരാക്കുന്ന തരത്തിലാണ് പുതിയ സംവിധാനത്തിന്റെ രൂപകൽപ്പന. മുംബൈയിൽ നടന്ന മെറ്റയുടെ വാർഷിക ബിസിനസ് ഉച്ചകോടിയുടെ മൂന്നാം പതിപ്പിലാണ് പുതിയ മെറ്റാ ബിസിനസ് ഏജന്റ് അവതരിപ്പിച്ചത്. ചെറുകിട, ഇടത്തരം, വലിയ ബിസിനസുകൾക്ക് ഒരുപോലെ ഉപഭോക്തൃ ഇടപെടലുകൾ കൂടുതൽ കാര്യക്ഷമമാക്കുക എന്നതാണ് ലക്ഷ്യം.
ഉപഭോക്താക്കളുടെ ചോദ്യങ്ങൾക്ക് മറുപടി നൽകുക, ഉൽപ്പന്നങ്ങൾ നിർദേശിക്കുക, അപ്പോയിന്റ്മെന്റുകൾ ബുക്ക് ചെയ്യുക, വാങ്ങൽ നടപടികൾ പൂർത്തിയാക്കാൻ സഹായിക്കുക തുടങ്ങിയ സേവനങ്ങൾ ഏത് സമയത്തും നൽകാൻ കഴിയുന്ന തരത്തിലാണ് എഐ ഏജന്റ് രൂപകൽപ്പന ചെയ്തിരിക്കുന്നത്. ഇതിലൂടെ ബിസിനസുകൾക്ക് മനുഷ്യ ഇടപെടൽ ഇല്ലാതെയും ഉപഭോക്താക്കൾക്ക് വേഗത്തിലും വ്യക്തിഗതമാക്കിയ രീതിയിലും സേവനം ലഭ്യമാക്കാൻ സാധിക്കും. ഉപഭോക്താക്കളുമായി ആശയവിനിമയം നടത്തുന്നതിൽ മാത്രം ഒതുങ്ങുന്നതല്ല മെറ്റാ ബിസിനസ് ഏജന്റിന്റെ പ്രവർത്തനം. ബിസിനസ് ഉടമകൾക്ക് ഒരു ഡിജിറ്റൽ സഹായി എന്ന നിലയിലും ഇത് പ്രവർത്തിക്കും. ഉപഭോക്തൃ ബന്ധം ശക്തിപ്പെടുത്തുക, പ്രവർത്തന കാര്യക്ഷമത വർധിപ്പിക്കുക, വിൽപ്പനയും വളർച്ചയും മെച്ചപ്പെടുത്തുക തുടങ്ങിയ മേഖലകളിലും എഐയുടെ സഹായം ലഭ്യമാകും.
