കൊച്ചി : മെട്രോയുടെ പേട്ടമുതല് എസ്എന് ജങ്ഷന്വരെയുള്ള പാതയില് പരീക്ഷണ ഓട്ടം ഞായര് രാത്രി 12 മുതല് തിങ്കള് പുലര്ച്ചെവരെയും തിങ്കള് രാത്രി 12 മുതല് ചൊവ്വ പുലര്ച്ചെവരെയും നടക്കുമെന്ന് കൊച്ചി മെട്രോ റെയില് ലിമിറ്റഡ് (കെഎംആര്എല്) അധികൃതര് അറിയിച്ചു. മെട്രോ പാത എസ്എന് ജങ്ഷന്വരെ എത്തുന്നതോടെ മൊത്തം സ്റ്റേഷനുകളുടെ എണ്ണം 22ല്നിന്ന് 24 ആകും. വടക്കേക്കോട്ട, എസ്എന് ജങ്ഷന് സ്റ്റേഷനുകളുടെ നിര്മാണവും അവസാനഘട്ടത്തിലാണ്. കെഎംആര്എല് നേരിട്ട് ഏറ്റെടുത്ത് നിര്മിക്കുന്ന ആദ്യപാതയാണ് രണ്ടുകിലോമീറ്റര് വരുന്ന പേട്ട – എസ്എന് ജങ്ഷന്.
2019 ഒക്ടോബറിലാണ് ഈ പാത നിര്മാണം ആരംഭിച്ചത്. കോവിഡും തുടര്ന്ന് അടച്ചുപൂട്ടലും ഉണ്ടായെങ്കിലും സമയബന്ധിതമായി നിര്മാണം പൂര്ത്തിയാക്കി. പൈലിങ് നടത്തി 27 മാസങ്ങള്ക്കുള്ളിലാണ് പാത തയ്യാറായത്. 453 കോടി രൂപയാണ് മൊത്തം നിര്മാണച്ചെലവ്. സ്റ്റേഷന് നിര്മാണത്തിനാവശ്യമായ സ്ഥലം ഏറ്റെടുക്കലിന് 99 കോടി ചെലവായി. തിങ്കള് മുതല് സര്വീസ് സമയം പുനഃക്രമീകരിച്ചു. കോവിഡ് നിബന്ധനകളില് ഇളവുകള് നിലവില് വന്നതിനാല് കൊച്ചി മെട്രോ തിങ്കള് മുതല് ട്രെയിന് സര്വീസിനിടയിലെ ഇടവേള കുറയ്ക്കുന്നു. തിങ്കള് മുതല് ശനിവരെ തിരക്കുകൂടിയ സമയങ്ങളില് ഏഴരമിനിറ്റ് ഇടവിട്ടും തിരക്ക് കുറഞ്ഞസമയത്ത് ഒമ്പത് മിനിറ്റ് ഇടവിട്ടുമായിരിക്കും സര്വീസ്.
