വാഷിംഗ്ടണ് : മെക്സിക്കോയില് നടന്ന വെടിവെപ്പില് ഹിമാചല്പ്രദേശില് നിന്നുള്ള ട്രാവല് ബ്ലോഗര് കൊല്ലപ്പെട്ടു. മെക്സിക്കോയിലെ ടലൂമില് കരീബിയന് തീരദേശ റിസോര്ട്ടില് രണ്ട് മയക്കുമരുന്ന് സംഘങ്ങള് തമ്മിലുണ്ടായ സംഘര്ഷത്തിലാണ് ഇന്ത്യന് വംശജ കൊല്ലപ്പെട്ടത്. വെടിവെപ്പില് രണ്ട് പേര് കൊല്ലപ്പെട്ടതായി പ്രാദേശിക മാദ്ധ്യമങ്ങള് അറിയിച്ചിരുന്നു. അതില് ഒരാള് കാലിഫോര്ണിയയില് നിന്നുള്ള ഇന്ത്യന് വംശജയായിരുന്നു. പിറന്നാള് ആഘോഷിക്കാനാണ് ഇരുപത്തിയഞ്ചുകാരിയായ അജ്ഞലി റയോട്ട് ടലൂമിലെ തീരദേശ റിസോര്ട്ടില് എത്തിയത്. സീനിയര് സൈറ്റ് റിലയബിലിറ്റി എഞ്ചിനിയറാണ് കൊല്ലപ്പെട്ട അജ്ഞലി.
കഴിഞ്ഞ ദിവസമാണ് അജ്ഞലി പിറന്നാള് ആഘോഷിക്കാന് മെക്സിക്കോയില് എത്തിയത്. നാല് വിദേശി സുഹൃത്തുക്കളുമൊത്ത് ലാ മാല്ക്വറിഡ എന്ന റസ്റ്റോറന്റില് ഭക്ഷണം കഴിക്കാന് ഇരിക്കുകയായിരുന്നു അജ്ഞലി. ആ സമയത്താണ് രണ്ട് മയക്കുമരുന്ന് സംഘങ്ങള്ക്കിടയില് സംഘര്ഷമുണ്ടാകുന്നത്. ഇത് പിന്നീട് വെടിപ്പില് കലാശിക്കുകയായിരുന്നു. വെടിവെപ്പില് അജ്ഞലിയും ജര്മനിയില് നിന്നുള്ള സ്ത്രീയും കൊല്ലപ്പെട്ടു. കൂടെയുണ്ടായിരുന്ന മറ്റ് മൂന്ന് പേര്ക്ക് പരിക്കേറ്റതായി പ്രാദേശിക മാദ്ധ്യമങ്ങള് അറിയിച്ചു. അജ്ഞലിയുടെ ഇന്സ്റ്റഗ്രാം അക്കൗണ്ട് പരിശോധിച്ചപ്പോഴാണ് ഇവര് ഹിമാചലില് നിന്നുള്ള ട്രാവല് ബ്ലോഗറാണെന്ന് കണ്ടെത്തിയത്. കാലിഫോര്ണിയയിലെ സാന് ജോസിലാണ് അജ്ഞലി താമസിക്കുന്നത്.