തിരുവനന്തപുരം: സംസ്ഥാനത്ത് മില്മ പാല് ശേഖരണ സമയം പുനഃക്രമീകരിക്കുമെന്ന് മൃഗസംരക്ഷണ- ക്ഷീരവികസന വകുപ്പ് മന്ത്രി ജെ ചിഞ്ചുറാണി. പാല് ഉത്പാദനം കൂട്ടാനും കറവയുടെ ഇടവേള ദൈര്ഘ്യം കൂട്ടാനുമാണ് ഇത്തരത്തില് സമയം പുനഃക്രമീകരിക്കാന് ആലോചിക്കുന്നത്. രാവിലെ ആറിനും വൈകിട്ട് ആറിനും എന്ന ക്രമത്തില് പാല് ശേഖരണ സമയം പുനഃക്രമീകരിക്കാനാണ് നീക്കം. ഇതുവഴി കറവയ്ക്കിടയില് 12 മണിക്കൂര് ഇടവേള നല്കാനാകുമെന്നും കൂടുതല് പാല് ഉത്പാദിപ്പിക്കാന് സാധിക്കുമെന്നും മന്ത്രി വ്യക്തമാക്കി.
മൃഗസംരക്ഷണ വകുപ്പിന്റെയും തിരുവനന്തപുരം ജില്ലാ പഞ്ചായത്തിന്റെയും കീഴിലുള്ള ചെറ്റച്ചല് ജഴ്സി ഫാമില് നവീന രീതിയില് പണികഴിപ്പിച്ച കിടാരി ഷെഡിന്റെയും ആട് ഷെഡിന്റെയും ഉദ്ഘാടനം നിര്വഹിച്ചു സംസാരിക്കവെയാണ് മന്ത്രി ഇക്കാര്യം അറിയിച്ചത്. പശുക്കളുടെ ആരോഗ്യം മാത്രമല്ല, തൊഴിലുറപ്പ് പോലുള്ള ജോലികളില് ഏര്പ്പെട്ടിരിക്കുന്ന ക്ഷീരകര്ഷകര്ക്കെല്ലാം അവരുടെ പാല് പാഴാക്കാതെ സൊസൈറ്റികളില് നല്കാനാകുമെന്നും മന്ത്രി പറഞ്ഞു.
