തിരുവനന്തപുരം : സംസ്ഥാനത്ത് പാൽ വില വർദ്ധിപ്പിക്കുന്ന കാര്യത്തിൽ തീരുമാനമെടുക്കാൻ മിൽമയുടെ ഡയറക്ടർ ബോർഡ് യോഗം ഇന്ന് ചേരും. ലിറ്ററിന് നാല് രൂപ വർദ്ധിപ്പിച്ച് പാലിന്റെ വില 56 രൂപ ആക്കാനാണ് നിലവിലെ തീരുമാനം. ഇന്ന് ചേരുന്ന ഡയറക്ടർ ബോർഡ് യോഗം ഇതിന് അംഗീകാരം നൽകുന്നതോടെ പുതുക്കിയ വില നാളെ മുതൽ പ്രാബല്യത്തിൽ വരും. വില വർധനവിന് നേരത്തെ തന്നെ സർക്കാർ അനുമതി നൽകിയിരുന്നു. പുതിയ വില വർധനവ് നടപ്പിലാകുന്നതോടെ കർഷകന് ലിറ്ററിന് 3.3 മമ രൂപ (ഏകദേശം 3.35 രൂപ) ലഭിക്കുന്ന രീതിയിലാണ് ക്രമീകരണം നടത്തിയിരിക്കുന്നത്.
പാലിന് വില കൂടുന്നതിനോടൊപ്പം മിൽമ പുറത്തിറക്കുന്ന മറ്റ് പാൽ ഇതര ഉൽപ്പന്നങ്ങൾക്കും ആനുപാതികമായി വില വർദ്ധിക്കും. കഴിഞ്ഞ ഡയറക്ടർ ബോർഡ് യോഗത്തിൽ തന്നെ വില വർദ്ധിപ്പിക്കാൻ തീരുമാനമെടുത്തിരുന്നെങ്കിലും തെരഞ്ഞെടുപ്പ് പെരുമാറ്റചട്ടം നിലവിലുണ്ടായിരുന്നതിനാലാണ് പ്രഖ്യാപനം നീണ്ടുപോയത്. യോഗത്തിന് ശേഷം മിൽമ ഔദ്യോഗിക പ്രഖ്യാപനം നടത്തും.
